En marcha unha aplicación para amosar ao mundo os produtos coa marca Galicia Calidade
luns, 6 de abril do 2015
Os días pasados a
Consellería de Economía e Industria puxo ao alcance da man da
cidadanía unha ferramenta para amosar aos consumidores os produtos e
servizos que se presentan baixo o paraugas de Galicia Calidade. A
aplicación móbil de Galicia Calidade, segundo sinalan fontes da
consellería, está dispoñíbel para a súa descarga de balde, tanto
para os
usuarios de iOS como para quen tivera
optado por Android. “Coa aplicación”, engádese, “o
cidadán poderá comprobar no punto de venda se un produto conta co
distintivo”. Tamén fornecerá outros datos de interese tanto das
empresas certificadas como de Galicia Calidade.
Segundo engade a
consellería, a ferramenta é ante todo un xeito de acurtar
distancias entre os produtos abeirados ao dito distintivo e a
cidadanía, establecendo unha canle firme entre os dous puntos. A
aplicación, nun plano máis concreto, achéganos un factor
distintivo no punto de venda, diferenciando a orixe xeográfica e o
concepto de calidade ligados aos produtos expostos. Segundo lembran
os impulsores da app acerca do que significa poder amosar nos
móbiles o citado distintivo, “a marca de garantía representa o
compromiso das empresas galegas por ofrecer os mellores produtos e
servizos, e o uso das mellores prácticas para a produción, a
elaboración e a comercialización, podendo resultar un factor
determinante á hora da elección dun produto”.
Quen descargue a
aplicación estará en disposición de atopar toda a actualidade de
Galicia Calidade e das empresas certificadas. “Ademais”,
explícase dende Economía e Industria, “tamén poderán
consultar, dun xeito cómodo e accesíbel, distintos datos de
interese relativos ás compañías, como a súa localización, ligada
ao navegador móbil, os datos de contacto, ou o acceso aos seus
perfís públicos en redes sociais, entre outros”.
Lembrar que Galicia
Calidade conta na actualidade con máis de 250 produtos e servizos
certificados, un factor que en palabras da consellería “fai
decisiva a posta en marcha de ferramentas como esta app, que
permitirá coñecer e diferenciar os mellores produtos galegos que
contan coa marca de garantía”.
Por certo que a través
de cada ficha de empresa fornecida pola aplicación, poderemos
acceder ao seguinte:
-Imaxe e descrición de
cada empresa
-Listaxes dos seus
produtos e/ou servizos certificados pola marca de garantía
-Ferramentas de
contacto integradas co móbil
-Marcación de teléfono
-Correo electrónico
-Páxina web
-Redes sociais
-Localización en mapa
e información de como chegar co navegador do teléfono
-Tenda en liña.
Por outra banda, a
ferramenta tamén nos leva da man ás últimas novidades de Galicia
Calidade, as súas actividades recentes de promoción ou o detalle
das novas incorporacións ao selo.