En marcha unha spin-off da USC que consolida e estende a tecnoloxía para mellorar a calidade do aire en pechado
xoves, 17 de febreiro do 2022
- O equipo promotor da empresa xunto a José Luis Villaverde, director da Área de Valorización, Transferencia e Emprendemento da USC, no acto de constitución
A
ferramenta tecnolóxica impulsada dende USC para estimar e acadar a
ventilación óptima nas aulas da que temos falado en repetidas
ocasións dende Código Cero (con motivo da súa aplicación nos
centros educativos da nosa xeografía e da posta en marcha da súa
web, ventilacion.usc.es),
deu esta semana un paso de xigante en materia de consolidación e
espallamento. O motivo? A
posta en marcha oficial de VentilatioLab, spin-off da
Universidade de Santiago que ten a súa orixe na dita aplicación, un
recurso de gran utilidade para optimizar a calidade do aire en
espazos pechados e frear deste xeito a COVID-19 mellorando as
condicións de habitabilidade.
A
empresa VentilatioLab
desenvolve unha tecnoloxía propia que, a través do cálculo de
dinámica de fluídos, establece cal debe ser a localización e
número dos ocupantes de cada espazo para mellorar a salubridade do
aire. “A chave é a identificación de dominios de fluxos de aire
illados dentro do propio espazo, de forma que os aerosois (nanogotas)
exhalados polos ocupantes nun dominio non alcancen a outros e, por
tanto, non sexan inspirados polos demais ocupantes do espazo”,
explican os promotores desta iniciativa.
VentilatioLab
é froito do traballo dun equipo de investigadores da Facultade de
Física da USC. Alberto Pérez Muñuzuri, Alberto Otero Cacho e Jorge
Mira Pérez (ao que se unen o tamén físico Pablo Criado Boado e o
economista Ramón Tubío Villanueva, como director) son os impulsores
da iniciativa. O equipo investigador parte da súa experiencia en
física de fluídos e o estudo do seu comportamento en gran
diversidade de contextos (incluíndo meteoroloxía e oceanografía),
experiencia que xa foi aplicada con éxito ás novas necesidades de
control de ventilación tras a crise da COVID-19.
Segundo
indican, as predicións que elabora VentilatioLab poden ser
explotadas dende a fase de deseño arquitectónico e enxeñería de
ventilación, para así garantir que os espazos públicos de nova
creación posúan uns fluxos de correntes óptimos dende o punto de
vista da saúde. “VentilatioLab permite entender as necesidades de
ventilación de cada local singularizado e achegar solucións
sinxelas para mellorar a calidade do aire”, explican os
responsábeis da empresa, engadindo que se busca optimizar a
ocupación e capacidade dun espazo, “garantindo a calidade do aire
e mantendo separadas as burbullas”, engaden.
Experiencias
previas
A
tecnoloxía que desenvolve a nova spin-off da USC centrada na
auditoría do aire en espazos pechados, xa foi validada con éxito en
contornas de hostalería e educación. Así, a comezos de 2021, os
investigadores da USC presentaban unha aplicación en liña dirixida
a centros escolares de toda Galicia coa que optimizar o tempo de
ventilación nas aulas en función das características propias dos
centros.