Enxenio recibe unha importante certificación de calidade para a súa plataforma de distribución de ebooks
martes, 1 de outubro do 2013
A empresa galega Enxenio,
da que temos falado en Código Cero co gallo do desenvolvemento de
Elibro-galego,
plataforma de distribución de e-books para a Asociación Galega de
Editores, obtivo a
certificación ISO/IEC 25000 de calidade software para un dos seus
produtos, xCloud eBookStore, tecnoloxía propia para distribución
de ebooks. Esta certificación, segundo nos
lembra o Clúster TIC de Galicia (do que Enxenio forma parte), vén
da man de AENOR, Axencia Española de Normalización, e de ACQ Lab,
centro acreditado por ENAC para a realización de ensaios de
comprobación de calidade de aplicacións informáticas.
A devandita norma, tamén coñecida como Square
(Software Product Quality Requirements and Evaluation), define o
proceso de avaliación da calidade dun produto software e as
características que poden ser examinadas, como a funcionalidade, o
rendemento, a compatibilidade, o nivel de uso, a seguridade ou o
mantemento, entre outras. Deste xeito, engade o Clúster, “Enxenio
forma parte das tres primeiras empresas a nivel nacional en
certificar a calidade e o mantemento dun dos seus produtos, é dicir,
o grao no que este facilita o seu mantemento de forma efectiva,
eficiente, segura e satisfactoria”.
Lembrar por último que xCloud eBookStore é, en
palabras de Enxenio, unha solución completa e personalizábel para
que as empresas do sector editorial poidan dispor da súa propia
plataforma en liña de venta de libros electrónicos. A plataforma
inclúe un lector de ebooks para que os usuarios
poidan acceder ás obras mercadas dende calquera dispositivo, pudendo
mesmo lelos sen ter conexión á Rede. Tamén posibilita a
sincronización automática da lectura nos diferentes trebellos dos
que se dispón, entre outras moitas cousas.