Este venres, nova charla sobre Intelixencia Artificial dende o CIA de Ourense
martes, 23 de marzo do 2021
O
Centro de Intelixencia Artificial (XIA) do Concello de Ourense retoma
esta semana o ciclo Os venres con IA, desta volta coa
profesora da Universidade Nacional de Educación a Distancia (UNED)
Ángeles Manjarrés, que falará da Axenda
2030 e dos principais
desafíos en materia de tecnoloxías avanzadas con altas capacidades
para acubillar, xestionar, analizar e comprender a información.
Na
charla, que se emitirá online este venres ás 12.00 horas a
través da canle de vídeos do CIA, analizarase desde unha
perspectiva crítica a potencial contribución das tecnoloxías
intelixentes á satisfacción dos Obxectivos de Desenvolvemento
Sustentábel de Nacións Unidas, e preséntanse ferramentas,
metodoloxías e técnicas de soporte ao desenvolvemento de
aplicacións coherentes con este propósito. A
información sobre estas actividades está dispoñíbel na web do
CIA.
A relatora
- A investigadora e profesora da UNED, Ángeles Manjarrés
Tras
iniciar a súa carreira no centro I+D de Alcatel-SESA, Ángeles
Manjarrés foi docente e investigadora do departamento de
Intelixencia Artificial da UNED desde 1992, coa excepción dunha
estancia post-doutoral en INRIA-IRISA, en Rennes (Francia).
A
súa investigación en Intelixencia Artificial céntrase actualmente
no eido das ontoloxías e os Sistemas Recomendadores Educativos
Personalizados en plataformas de aprendizaxe en liña, e en robótica
educativa.
Participou
en numerosos proxectos nacionais e internacionais no contexto da súa
colaboración co grupo AdeNu (Adaptive Dynamic online Educational
systems based oN User modelling) da UNED, cuxa actividade xera
unha importante produción científica.
Desde
o ano 2000 realiza investigacións en innovación educativa para o
desenvolvemento humano e a sustentabilidade, en colaboración con
ONGD.
Desde
2006 pertence ao grupo EDTIC, Educación para o Desenvolvemento na
área das TIC, adscrito ao Centro de Innovación en Tecnoloxías para
o Desenvolvemento Humano da UPM, e desde 2016 a COETIC, grupo de
innovación docente para o desenvolvemento da competencia ética e
cívica e as metodoloxías baseadas na comunidade na educación
superior da UNED.