FEUGA renova a súa imaxe coincidindo co seu 40 aniversario
martes, 8 de novembro do 2022
Coincidindo
co seu 40 aniversario (catro décadas tendendo pontes de innovación,
formación, transferencia e empregabilidade entre os campus e o
tecido produtivo), a Fundación Empresa-Universidade Galega vén de
estrear nova imaxe. A renovación constitúe, en palabras da
entidade, “un xiro á identidade corporativa de FEUGA” co
obxectivo de reflectir os retos da súa nova etapa e “así poñer o
acento na innovación, o impulso do talento e a consolidación das
liñas de traballo da fundación no ámbito da Unión Europea”.
A
súa renovada marca incide no seu papel de conexión entre
universidade e empresa e na transferencia tecnolóxica e de
coñecemento como axente catalizador de ideas innovadoras entre
Galicia e Europa e que, de forma gráfica represéntase cun símbolo
a xeito de ponte que une as dúas letras (EU). “O labor de FEUGA
cobra especial relevancia como ligazón entre o ámbito da formación
e o das novas necesidades do mercado laboral que demanda perfís
innovadores, unha aposta polo I+D+i e unha maior proxección
internacional nun mundo globalizado”, explican dende a fundación,
engadindo que “a nova identidade corporativa opta por liñas
sinxelas, sobrias e vangardistas que incorporan cores vivas dando así
unha imaxe contemporánea que reflicte os desafíos que se marca a
entidade no seu aniversario”.
En
palabras de Javier Pereiro, director de FEUGA, “comezamos esta
década mirando ao futuro, abrindo liñas de traballo que cubran as
inquietudes e necesidades actuais do tecido industrial galego, dos
nosos investigadores e dos titulados universitarios e en formación
profesional”.
A
renovación da imaxe abrangue a todos os soportes corporativos da
fundación, incluída a web de seu
e as súas redes, así como a un dos seus buques insignia durante
estes 40 anos de percorrido: o
portal de bolsas.