Fíltrase o que podería ser o primeiro móbil con Android de Sony Ericsson

Aínda que o sistema operativo Android só o estamos a ver actualmente en terminais de HTC, moitos outros fabricantes están a preparar móbiles que empreguen este software promovido por Google, e aínda que dende Nokia xa desbotaron esta liña de desenvolvemento, dende Sony Ericsson decidiron tirar para adiante e espérase que integren Android en terminais da liña XPERIA, e incluso filtráronse imaxes do que será o primeiro móbil deste tipo, Rachael.
O terminal funcionaría cun procesador Qualcomm QSD8250 Snapdragon a 1 GHz, soportaría conectividade HSPA de ata 7,2 Mbps, tería soporte de gráficos 3D, incluiría unha cámara de 8 Mpíxeles con enfoque automático, toma de auriculares de 3,5 milímetros, toma mini-USB e pantalla táctil dunhas 4 polgadas cunha resolución de 800 x 480 píxeles.
Todos estes detalles serían estimados, pois o produto aínda non está pechado, e tampouco chegaría ao mercado durante o presente ano, polo que as súas especificacións poderían variar bastante.