GAIN presentará nunha xornada a nova licitación de solucións innovadoras con vehículos non tripulados
martes, 10 de maio do 2022
A
Axencia Galega de Innovación (GAIN) organizará este 13 de maio unha
xornada técnica para presentar a nova licitación para o
desenvolvemento e adquisición de solucións innovadoras con
vehículos non tripulados: tecnoloxías para os ámbitos das
emerxencias sanitarias e sociais e para a xestión forestal e dos
recursos mariños. O investimento é de 6,5 millóns de euros. A cita
será como dixemos este 13 de maio a partir das 10:00 horas de forma
presencial, na sede da Axencia Galega de Innovación (rúa Airas
Nunes, s/n, Santiago) e telemática.
O
rexistro debe realizarse a través do correo
civil-uavs-initiative@xunta.gal para a participación presencial e
dunha ligazón
específica para a asistencia online. En ambos os casos a
inscrición debe facerse antes do 11 de maio ás 15:00 horas. Temos
toda a información sobre o evento na
web de Civil UAVs Initiative.
A
xornada contará coa participación do vicepresidente segundo e
conselleiro de Economía, Empresa e Innovación en funcións,
Francisco Conde; e da directora da Axencia Galega de Innovación,
Patricia Argerey. Ademais, celebrarase unha mesa de diálogo coas
entidades usuarias das solucións nas que se abordará o impacto dos
novos desenvolvementos na prestación de servizos públicos da Xunta.
Nesta mesa estarán representadas as seguintes entidades: a Fundación
Pública de Urxencias Sanitarias de Galicia (061) da Consellería de
Sanidade, a Dirección Xeral do Monte da Consellería de Medio Rural,
a Subdirección Xeral de Gardacostas de Galicia da Consellería do
Mar, a Axencia de Emerxencias (AXEGA) da Vicepresidencia Primeira e
Consellería de Presidencia, Xustiza e Turismo, o Centro de
Investigacións Mariñas (CIMA) e o Centro Tecnolóxico do Mar
(CETMAR) da Consellería do Mar. A xefa de departamento de
coordinación da Civil UAVs Initiative, Belén Picos; e a xefa do
Gabinete de Desenvolvemento Lexislativo da Asesoría Xurídica Xeral
da Xunta de Galicia, Beatriz Allegue, realizarán a presentación
técnica da licitación e responderán as consultas dos asistentes.
Con
esta contratación, o Goberno galego busca “impulsar a compra de
solucións innovadoras moi próximas ao mercado”, ou sexa,
realizábeis en menos de 12 meses. Aquelas poden partir de resultados
intermedios do período anterior do Polo Aeroespacial de Galicia ou
doutros avances tecnolóxicos, para a súa incorporación a curto
prazo á carteira de servizos da Xunta de Galicia.
Segundo
explica GAIN, a fórmula da licitación é a da Asociación para a
Innovación, coa que a Xunta de Galicia consegue un duplo obxectivo:
“Por unha banda, mellorar a eficiencia dos servizos públicos e,
por outro, validar, testar e ser o primeiro cliente das solucións e
produtos desenvolvidos polas empresas e centros de coñecemento”.
Os
proxectos, que serán financiados con fondos REACT-EU (6 millóns) e
fondos propios da Administración autonómica (0,5 millóns), deberán
centrarse, en concreto, no desenvolvemento e adquisición de
solucións innovadoras por medio de vehículos non tripulados (UAVs)
para a atención sanitaria urxente no Camiño de Santiago; a
monitoraxe de zonas forestais para a prevención, extinción de
incendios e restauración post-incendios; a inspección e vixilancia
pesqueira, marisqueira e acuícola; a localización de persoas
extraviadas; e a análise de poboacións de sementes de mexillón e
especies cohabitantes.