GPUL celebra os seus quince anos de actividade cun concurso para atopar novo logotipo
xoves, 23 de xaneiro do 2014
O Grupo de Programadores e Usuarios de Linux, GPUL,
segue adiante amosando as múltiples vantaxes do software libre, a
tódolos niveis, perante a sociedade galega. E segue a facelo logo de
quince anos, cousa moi a ter en conta se pensamos nas moitas cousas
tecnolóxicas que aconteceron ao ao longo destes quince anos e na
natureza do traballo despregado polos membros de GPUL: un traballo
voluntario feito coas súas propias mans. O caso é que non queren
deixar a oportunidade de conmemorar este traballo feito a prol do
software libre “e mantendo á Universidade da Coruña no primeiro
nivel deste ámbito a través da realización de pequenos e grandes
eventos nacionais e internacionais”, sinalan. A celebración farase
a través dun concurso para o deseño dun novo logo.
O certame de conmemoración ten o obxectivo de
atopar o mellor distintivo visual de GPUL, premiándose os dous
primeiros deseños seleccionados. A/o deseñadora/or que obteña máis
votos recibirá cen euros máis unha Pack Raspberry Pi totalmente
configurada para utilizar como MediaCenter. O segundo recibirá 25
euros e outra Pack Raspberry Pi totalmente configurada para utilizar
como MediaCenter. Para quen queira informarse polo miúdo xa están dispoñibles as bases
do concurso en formato PDF.
Lembrar que GPUL (Asociación Universitaria Grupo de
Programadores e Usuarios de Linux) ten a súa sede na Facultade de
Informática da Coruña e os seus obxectivos son, entre outros, a
promoción do software libre, o fomento do seu uso, o achegamento
deste tipo de programas á sociedade en xeral e ao colectivo
universitario en particular.