Galicia Avanza impulsará a presenza internacional de 30 empresas de alicerce tecnolóxico
mércores, 14 de setembro do 2022
A
Tecnópole (Parque Tecnolóxico de Galicia, San Cibrao das Viñas,
Ourense) acolleu este martes 13 de setembro a presentación do
programa de aceleración de novos e innovadores proxectos
empresariais Galicia
Avanza, que está chamada a ser unha lanzadeira referencial para
facilitar a chegada e consolidación das pemes galegas no ámbito
internacional. A aceleradora Galicia Avanza, que traballará dende as
fórmulas infalíbeis da I+D+i e a sustentabilidade, foi
presentada nos seus detalles polo conselleiro de Economía, Francisco
Conde.
Segundo
se fixo saber na cita celebrada na Tecnópole, este novo programa
distínguese por ter sido concibida para pequenas e medianas empresas
galegas de alicerce tecnolóxico que teñan entre mans solucións
innovadoras para exportar a outros mercados.
Así,
Galicia Avanza vai apoiar a consolidación no mercado internacional
de 30 empresas a través dun plan de traballo de oito meses de
duración nos que as participantes poderán acceder a servizos de
asesoramento e formación especializada.
O
vicepresidente económico subliñou “a necesidade de apostar polo
talento, a tecnoloxía e a I+D+i para atopar alternativas ao modelo
económico actual”. Neste ámbito é onde porá o foco Galicia
Avanza, que se localizará na Tecnópole.
Conde
salientou que o Parque Tecnolóxico de Galicia destaca pola súa
oferta de servizos ao tecido empresarial pero tamén polas
infraestruturas ás que vai dar cabida como o Centro de excelencia en
Ciberseguridade de Galicia ou a primeira comunidade enerxética nun
polígono empresarial galego para que as compañías poidan acceder a
un prezo enerxético máis competitivo.