Galicia Exporta Dixital ten aberto o prazo de participación até o 27 de abril
luns, 21 de marzo do 2022
O
director do IGAPE, Fernando Guldrís, inaugurou un webinario
sobre o programa Galicia Exporta Dixital, iniciativa destinada a
fomentar competitividade e a rendibilidade das nosas empresas a
través da busca de novos mercados, proceso que se ve favorecido e
facilitado polas ferramentas tecnolóxicas. O programa, segundo
indicou Guldrís, ten aberto o prazo de presentación de solicitudes
ata o vindeiro 27 de abril. Ofrece a pemes e autónomos ferramentas
dixitais innovadoras para promover as súas vendas no exterior.
Guldrís
destacou que ata o de agora o programa permitiu impulsar máis de 330
plans de internacionalización encamiñados á promoción das
empresas e os seus produtos en máis de 90 países, por importe de
preto de 12M€.
O
webinario veu da man da Vicepresidencia Segunda e a
Consellería de Economía en colaboración co Hub de Innovación
Dixital Datalife.
Segundo
explicou o director do IGAPE, a nova edición de Galicia Exporta
Dixital conta cun orzamento de 4,4 millóns, orientados a “facilitar
aos beneficiarios acometer actuacións de consultoría como
diagnóstico de potencial exportador dixital, plans de
internacionalización dixital multicanle, plans de mercados
electrónicos concretos ou cubrir gastos de asesoría xurídica e
legal para a internacionalización dixital”. Tamén se busca
achandarlles o camiño para “adquirir software relacionado con
solucións tecnolóxicas con vistas a crear, xestionar e conectar
catálogos dixitais internacionais, programación a medida, solucións
de analítica ou intelixencia automatizada así como de mercadotecnia
inbound ou mesmo crear e adaptar tendas en liña”.