Galicia mobiliza 13,6 millóns de euros para transformar máis de 200 pemes

A Xunta de Galicia mobilizará un total de 13,6 millóns de euros a través das axudas á dixitalización para que máis de 200 pemes poidan ter acceso á realización de proxectos de desenvolvemento tecnolóxico. Estas axudas, co-financiadas por fondos FEDER, supoñen un incremento do apoio ás pequenas e medianas empresas de calquera sector do 50% e de arredor dun 70% para empresas dos sectores téxtil, automoción e industria naval.
Sofisticados sistemas de comercio electrónico, ou sistemas de intelixencia de negocio son algunhas das iniciativas que destacan destas edicións, así como a adquisición de equipamento e software. Con estas axudas preténdese “favorecer a aparición de sinerxías entre pemes, iniciativas individuais e proxectos colectivos, e tamén a creación de obradoiros de dixitalización, que serán financiados ao 100% con case 400.000 euros”. O seu obxectivo será “promover arredor de 20 plans de difusión nos que participan 350 pemes e que incentiven a creación de espazos de solucións tecnolóxicas”.
A un nivel máis concreto, a través destas actividades habilitaranse sistemas informáticos nos catro ámbitos con máis potencial para achegar valor ás empresas: proxectos sectoriais multiempresa, proxectos interempresariais, proxectos intraempresariais e proxectos de Intelixencia Artificial. Tamén abordarán ámbitos como a transformación tecnolóxicas en empresas de economía social e a aplicación das tecnoloxías 4.0 en diferentes sectores produtivos.
Estes programas, postos en marcha polo Goberno galego, forman parte do Plan de transformación dixital das pequenas e medianas empresas, que teñen por obxectivo facilitar a reactivación do tecido produtivo no contexto económico despois da crise da COVID-19. Entre estas medidas tamén se atopan os cheques de dixitalización, destinados para que preto de 3500 pemes impulsen proxectos de dixitalización que lles permitan reforzar as súas actividades empresariais.