Galiciencia abre o prazo para a recepción de proxectos innovadores
venres, 11 de setembro do 2009
A meirande e máis importante feira científica que se celebra cada ano no
noso país, a Galiciencia, está.ultimando
detalles para dar comezo nunha nova edición entre os días 25 e 27 de novembro nas instalacións do Parque
Tecnolóxico de Galicia en San Cibrao das Viñas, onde non faltarán actividades lúdicas
relacionadas coa tecnoloxía e coa innovación para que os mozos e mozas
asistentes se divirtan mentres aprenden e se relacionen con outros mozos coas
súas mesmas inquedanzas.
Un ano máis, a Galiciencia ábrelle
as súas portas aos estudantes de Secundaria de toda Galicia que desexen presentar
os seus propios proxectos experimentais e tecnolóxicos ou traballos documentais,
os cales terán de prazo ata o vinderio 25 de outubro para facer chegar as súas
propostas.
As bases
de participación na Galiciencia 2009
están dispoñibles na web de Tecnópole,
onde a organización apunta que o “requisito
fundamental” é formar un equipo no que participen varios alumnos e un
profesor e contar a idea principal en tres folios.
Segundo veñen de anunciar os responsables da iniciativa, o comezo do curso
escolar supón o inicio da preparación dos proxectos para os equipos, “moitos dos cales xa se puxeron en contacto
coa Tecnópole no pasado mes de xuño para maniferstar o seu interese en
participar e consultar as primeiras dúbidas”.
A parte de facilitar o desprazamento e a estancia dos estudantes en Ourense
e montar a infraestrutura da feira, Tecnópole vai organizar actividades
paralelas para o público e para os propios participantes, os cales terán a
oportunidade de coñecer de primeira man ao xa habitual divulgador Adolf Cortel,
que volverá a Ourense cos seus relatorios de ciencia divertida.
Asemade, a edición deste ano contará con obradoiros e actos relacionados
coa celebración do Ano Darwin, do Ano Internacional da Astronomía e do Ano da
Creatividade e da Innovación.
Neste senso, ademais de actividades relativas á Teoría da Evolución e da
instalación dun planetario, Galiciencia
contará cunha sección especial que estará ocupada polos proxectos resultantes
do programa TIC-TAC! Talentos da
Innovación e da Creatividade, unha iniciativa na que a Fundación
Empresa-Universidade Galega (FEUGA) e Tecnópole colaboran para poñer en
contacto a alumnos galegos de Secundaria e de FP coa experiencia do
emprendemento innovador e que lles axudará a deseñar o seu propio plan de
negocio con base nas súas ideas e inventos. Esta iniciativa foi seleccionada
pola Fundación Española de Ciencia y Tecnología (FECYT) para ser financiada no
marco do seu Programa para o Fomento da Cultura Científica e Tecnolóxica.
Os proxectos expostos na Galiciencia
serán sometidos á votación dos visitantes e dun xurado formado por
emprendedores da Tecnópole, que elixirán os mellores para outorgarlles o
primeiro e o segundo premio da feira.