Galipizza busca nas redes sociais un nome axeitado para o seu vehículo distintivo
luns, 14 de xullo do 2014
Non
todo ía ser igual no eido das pizzas. Estabamos agardando por algo
diferente? Pois probablemente xa chegou, e tivo que ser dende a nosa
terra. A empresa galega Galipizza&cia
quere rachar con moitos dos tópicos ligados a este sector da
gastronomía e xa de primeiras non quere agardar a que os clientes a
busquen nas guías, porque xa se lanza ela mesma a buscalos botando
man dunha furgoneta clásica Citroën HY personalizada que amais de
punto de venda, tamén é cociña itinerante para os festivais
galegos do verán. Pois ben, dáse a circunstancia de que o vehículo
aínda non ten nome, e por esta razón Galipizza vén de pór en
marcha un concurso nas redes sociais para atoparllo.
A
empresa (que ten locais físicos xa establecidos en Viveiro, Ribadeo
e Culleredo, amais doutro novo para Santiago) estreou coa chegada
deste verán o seu innovador medio de transporte, a dita furgoneta
Citroën HY. O vehículo en cuestión, presentado oficialmente a
pasada fin de semana no IX Festival Arreaocabo, en Celeiro, xa ten
confirmadas outras localizacións nalgúns dos certames máis
coñecidos este verán, como o Resurrection Fest, en Viveiro, e o
Novomesoifest, en A Coruña. Até aquí todo ben, pero a empresa
recoñece que a estratexia non estará completa até que a
furgoneta-distintivo teña nome de seu. Como conseguir a máxima
participación e polo tanto meirandes probabilidades de dar co
apelativo máis axeitado? Pois para os responsábeis de Galipizza a
resposta está nas redes sociais. De aí que estea a botar man xa dos
seus clientes e seareiros en Facebook
e Twitter cun concurso
específico de procura de nome para o vehículo. A empresa premiará
“a creatividade e orixinalidade das propostas”, e nas vindeiras
semanas decidirá entre tódalas achegas recibidas o nome que máis
se axuste ó seu estilo.