Gradiant comandará un dos grupos de traballo da Alianza Europea para a Innovación na Internet das Cousas
mércores, 17 de xuño do 2015
O centro
tecnolóxico Gradiant vén de ser elixido como a entidade que
liderará e coordinará un dos grupos de traballo investigador máis
salientábeis da Alianza Europea para a Innovación na Internet das
Cousas, a Alianza AIOTI. Esta
iniciativa, que se apoia no traballo do Clúster de Investigación
Europea na Internet das Cousas (IERC), ten o obxectivo de fomentar e
impulsar o desenvolvemento de tecnoloxías baseadas no concepto dos
obxectos conectados como fonte de información e comunicación. Este
labor serviralle de apoio á Comisión Europea, que segundo nos
lembran dende Gradiant, considera como ámbito prioritario de
traballo o eido da Internet das Cousas (así se fai saber no contexto
do Programa Marco Horizonte 2020).
Amais de fomentar e
impulsar tecnoloxías baseadas nos obxectos conectados, a Alianza
fará guías de traballo orientadas a mellorar a eficacia e
eficiencia dos desenvolvedores: recomendacións relativas ao deseño
e obxectivos dos proxectos piloto a gran escala que se porán en
marcha en toda Europa a partir de 2017. E co apoio do Horizonte 2020
da Comisión Europea. Dentro da Alianza AIOTI creáronse once grupos
de traballo (WG), formados polos principais actores dentro da
industria e a investigación a nivel europeo.
Trátase dos seguintes
grupos: WG 1: Clúster de investigación europea en IoT, WG 2:
Ecosistemas de Innovación, WG 3: Estandarización IoT, WG 4:
Aspectos políticos (responsabilidade, seguridade, privacidade), WG
5: Contornas intelixentes para o envellecemento activo, WG 6: Smart
Farming e seguridade alimentaria, WG 7: Wearables, WG 8:
Cidades Intelixentes,WG 9: Mobilidade intelixente, WG 10: Ambiente
intelixente e, por último o grupo WG 11: Fabricación intelixente.
Segundo informa Gradiant,
de todos os colectivos de traballo resulta de “especial relevancia”
para Galicia o grupo sexto, o referido a Smart Farming and Food
Security (Granxas Intelixentes e Seguridade Alimentaria), debido
sobre todo “á importancia que o sector primario e as actividades
agrogandeiras teñen para a Produto Interior Bruto Galego e a súa
particular estrutura.
Gradiant será a entidade
encargada de comandar este grupo sexto. Polo que respecta aos demais
postos de dirección (board) do resto dos colectivos de
traballo, sinalar que serán asumidos por grandes compañías do
ámbito tecnolóxico e innovador, como Cisco, Samsung, Bosch,
Vodafone, Sigfox ou Philips, amais de entidades como ETSI ou outros
axentes de investigación punteiros a nivel europeo como SINTEF.
A Internet das Cousas
Respecto ao concepto da
Internet das Cousas e o seu alcance, o centro Gradiant lembra que
este ámbito de investigación representa o seguinte paso cara á
dixitalización da nosa sociedade e a nosa economía, “un futuro no
que os obxectos e as persoas estarán interconectados a través de
redes de comunicación, informarán e mesmo poderán interactuar
sobre o seu estado e o da súa contorna”.