Gradiant impulsa metodoloxías para garantir a máxima privacidade no deseño industrial
luns, 14 de marzo do 2016
Unha das moitas liñas de
traballo do
centro tecnolóxico Gradiant no ámbito da seguridade é a súa
contribución ao proxecto PRIPARE, polas súas siglas en inglés
PReparing Industry to Privacy-by-design by supporting its
Application in Research (traducíbel por Preparando a
Industria para a Privacidade no Deseño Industrial apoiando a súa
Aplicación en Investigación). O proxecto foi financiando en
parte pola Comisión Europea, a través do Sétimo Programa Marco
(FP7). O seu obxectivo é facilitar a aplicación de metodoloxías de
privacidade e seguridade no deseño industrial e de tecnoloxías
intelixentes (security-by-design), e todo isto facendo fincapé
na necesidade de pór en marcha as ditas metodoloxías no intre mesmo
en que se crean e materializan as tecnoloxías.
Segundo informa Gradiant,
as ditas metodoloxías “garanten que o deseño de sistemas TIC teña
en consideración requirimentos de seguridade, incluíndo a
privacidade dos usuarios, e implementando mecanismos axeitados para o
seu cumprimento”.
Os participantes en
PRIPARE son, amais do centro galego Gradiant, Trialog (coordinador),
Atos, Trilateral Research and Consulting, Inria, The American
University of Paris, a Universidade Politécnica de Madrid,
University of Ulm, Fraunhofer SIT, Waterford Institute of Technology
e KU Leuven.
Ao abeiro do proxecto,
Gradiant coordina o grupo WP5 - Gaps and Recommendations.
Neste paquete de traballo identificaranse problemas que dificulten a
consideración de medidas para garantir a privacidade dos usuarios
durante o deseño de sistemas TIC. Asemade, o centro galega participa
de maneira activa no WP1 - Defining PRIPARE Methodology e máis
no WP6 - Dissemination within research and industry communities.
Engadir que PRIPARE
comezou a súa andaina en outubro de 2013, como iniciativa de impulso
tecnolóxico e, tamén, como fonte de material divulgativo e
formativo. De feito, a finais de 2015 os coordinadores do proxecto
ceibaron un conxunto de documentos que describen a práctica da
enxeñaría de privacidade industrial, “cubrindo actividades como a
administración de risco de privacidade, o estudo dos requirimentos,
as estratexias de deseño, o mantemento e a conformidade. Podemos ver
este
manual de metodoloxías nun documento PDF accesíbel para a
comunidade en liña e máis na
propia web da iniciativa.