Gradiant pon en xogo unha tecnoloxía que identifica unha persoa falante coas máximas rapidez e precisión
martes, 22 de marzo do 2016
O centro
tecnolóxico Gradiant está a dar pasos decisivos no ámbito da
tecnoloxía de recoñecemento de voz. Froito desta liña de
traballo e desta experiencia adquirida xorde GradiantVoice,
un desenvolvemento que
xa conta con app de avaliación para dispositivos e
que destaca por integrar a tecnoloxía de identificación do locutor
máis recente do centro tecnolóxico galego (especialmente deseñada
para autenticación) coa seguridade en escenarios de mobilidade.
Segundo informa o centro, GradianVoice abrangue un conxunto de
bibliotecas prontas para a súa integración en plataformas móbiles
e de servidor. Como dixemos, permite a identificación e a
verificación da persoa falante aos poucos segundos de encetar o
discurso.
Como características salientábeis, podemos
destacar da tecnoloxía GradiantVoice que está deseñada e creada
para escenarios móbiles, que se procesa en dispositivos móbiles e
en tempo real (extracción rápida do modelo a partir de secuencias
de audio), que é multiplataforma (opera con todas as plataformas dispoñíbeis para móbles e de escritorio), que achega modelos
biométricos cen por cen compatíbeis entre computador e móbil, o
que posibilita diferentes arquitecturas de sistema. A maiores,
fornece as máximas garantías de seguridade, conveniencia e
dispoñibilidade, “grazas á doada combinación coas demais
modalidades biométricas de Gradiant, como Face Recognition ou
Signature Recognition”, segundo informan dende o centro tecnolóxico
galego.
Asemade, GradiantVoice integra no seu seo varios
módulos, co fin de “proporcionar unha solución completa de
autenticación”. Tamén abrangue módulos de control de adquisición
e micrófono para dispositivos móbiles, que permiten unha
integración rápida e máis o desenvolvemento de aplicacións de
terceiros. Outro dos seus elementos é un algoritmo rápido (Voice
Activity Detection) que é quen de detectar e desbotar segmentos de
silencios. Este algoritmo está cen por cen optimizado para
dispositivos móbiles.