Huawei felicitou o aninovo dende un iPhone
venres, 4 de xaneiro do 2019
Está a converterse en toda unha tradición que
á hora de promocionar un dispositivo móbil a través de Twitter algunha das
publicacións sexa contraditoriamente realizada dende un iPhone, de xeito que no
pasado puidemos ver como cazaron a Alicia Keys chíando dende un iPhone
mentres era directora creativa global
de BlackBerry (de feito, os propios
responsables de comunicación de BlackBerry cometeron o mesmo erro) ou
figuras máis próxima como Íker Casillas
chegou a publicitar un Samsung Galaxy S4 dende un iPhone, pero desta volta
resultou moi rechamante que a felicitación de
aninovo de Huawei chegase dende un iPhone.
A mensaxe en concreto borrouse rapidamente, pero non sen antes ser moi
difundida, e como consecuencia aseguran que un
par de empregados da compañía chinesa foron sancionados, xa que a
publicación dun chío de @Huawei dende un iPhone afectou negativamente á imaxe
da compañía.
Ao parecer, o erro cometeuno unha empresa de mercadotecnia chamada Sapient, que
ante os problemas que tiñan para conectarse a unha rede privada virtual para
evitar os bloqueos que dende China teñen páxinas como Twitter, Facebook ou
Google, empregaron un iPhone cunha tarxeta SIM de Hong Kong para poder acceder
ás redes sociais.