INTECO pon en marcha un indicador que avalía o grao de perigosidade dos e-mails

O Instituto Nacional de Tecnoloxías da Comunicación quere achegar máis seguridade a unha das manobras máis cotiás dos internautas: a apertura do correo electrónico (algo moi sinxelo pero que ultimamente ten máis perigo que beber auga do Umia).
Con este fin, vén de poñer en marcha a ferramenta IPCE (Índice de Perigosidade do Correo Electrónico), indicada para detectar as intencións dos e-mails que circulan na Rede e garantir a seguridade dos datos persoais dos cidadáns e empresas que a cotío fan uso destes servizos de balde en liña. A primeira versión deste indicador está activa na web de INTECO e grazas a el (di INTECO) poderemos coñecer de primeira man o volume de ataques ou intentos de ataque con virus informáticos co fin de tomar decisións sobre mellorar ou actualizar os nosos sistemas.
O indicador do devandito Instituto permitirá ollar máis de preto estas ameazas, avaliar a súa evolución e anticiparse na medida do posible os seus movementos. Segundo as estatísticas, arredor do 4% dos e-mails que circularon en 2005 pola Rede levaban algún tipo de virus informático.