Imatia patrocinará a entidade brasileira encargada de impulsar as TIC nos concellos
martes, 22 de marzo do 2016
A empresa galega Imatia,
especializada en desenvolvemento rápido de software para empresas e
administracións públicas, vén de establecer un acordo de
colaboración coa entidade brasileira ABEMTIC.
En virtude desta alianza, a firma da nosa terra achegará ao
devandito organismo o seu coñecemento e experiencia en materia de
adopción de novas tecnoloxías para o ámbito das institucións
públicas. Por exemplo a experiencia obtida a través da implantación
da plataforma Cividas (desenvolvida por Imatia) en múltiples eidos
administrativos. Sen
ir máis lonxe, Cividas está no alicerce da recentemente estreada
sede electrónica do Concello de Pontevedra.
Como lembraremos, Imatia
foi quen de medrar de xeito considerábel en Brasil dende 2013, ano
no que comezou a súa andaina coa Prefeitura
de Valinhos, unha localidade de 100.000 habitantes pertencente ao
Gran São Paulo, que decidiu introducir Cividas na súa área de
Urbanismo e publicar a súa Sede Electrónica. Asemade, afrontouse a
dixitalización de 50.000 fichas catastrais, con captura automática
de toda a información que conteñen.
Froito deste
proxecto, e co obxectivo de estreitar ligazóns coas entidades
brasileiras que están envorcadas coa implantación da
eAdministración no país, nace
a colaboración de Imatia coa ABEMTIC (Associação Brasileira de
Enteidades Municipais de Tecnologia da Informação e Comunicação).
Trátase dun colectivo que desde 2005 reúne a un bo número de
organismos públicos relacionados co sector TIC, promovendo a
cooperación técnica e administrativa entre os seus asociados de
todos os recunchos da xeografía brasileira. Imatia será a partir de
agora patrocinador oficial desta importante asociación, á cal
achegará a experiencia de seu co fin de mellorar a eficiencia das
administracións brasileiras, o grao de desenvolvemento do seu sector
TIC e, sobre todo, a calidade de vida dos cidadáns do país.
Recordar tamén
que “co obxectivo de ofrecer un mellor servizo aos seus clientes e
captar novas oportunidades no emerxente mercado brasileiro”, Imatia
decidiu abrir o pasado ano 2015 unha filial neste país,
converténdose a súa sede permanente na cidade de São Paulo na
primeira localizada no continente americano.