InLugo pecha ano con accións divulgativas na provincia e un concurso TIC sobre O Apalpador
martes, 15 de decembro do 2015
O Centro
de Innovación Social InLugo (Fundación TIC, Deputación de Lugo)
está a acometer a recta final de 2015 cun “amplo programa de
actividades destinado aos lucenses de máis de 55 anos”. Esta
escolma de iniciativas inclúe obradoiros en varios puntos da
provincia sobre alimentación e sobre o emprego do aparello móbil e
a tableta na vida cotiá. Tamén haberá actividades ligadas ás
festas do Nadal, actividades que culminan o día 22 coa xornada
Nadal: Sons e Recordos, aberta ao público na sede do
InLugo. O programa arrancou este luns 14 de decembro e tamén
abrangue a celebración dun obradoiro–concurso de fotografía
dixital, o certame O Apalpador TIC, e máis unha exposición
das instantáneas feitas polos maiores participantes acerca do dito
persoeiro galego e das celebracións feitas arredor del.
Como dixemos, o InLugo desprazarase a unha
ducia de concellos de todos os puntos da provincia para achegar a
formación aos maiores: Trabada, A Pontenova, O Valadouro, Guitiriz,
Láncara, Antas de Ulla, Vilalba, A Pobra do Brollón, Viveiro A
Fonsagrada, Navia de Suarna e Monforte de Lemos. Impartiranse tres
obradoiros, que comezarán o martes 15 de decembro. Son os seguintes:
O móvil como ferramenta diaria (a idea é amosar as
vantaxes do uso do teléfono móbil na vida diaria das persoas
maiores, posibilitándolles os coñecementos para realizar chamadas
de emerxencia ou o uso da alarma e da axenda para recordatorios), A
tableta como ferramenta diaria (utilidades
deste dispositivo: consulta de Internet, xestión dunha axenda ou
cámara fotográfica; tamén se tirará partido da aplicación Sempre
en activo para a prevención do deterioro cognitivo) e Nadal
Saudable (os participantes empregarán as tecnoloxías a prol
dunha alimentación saudábel).
Outra das actividades coas que o InLugo
celebra o remate de ano é o obradoiro-concurso de fotografía
dixital O Apalpador TIC. Neste caso, os asistentes
familiarizaranse coas cámaras fotográficas dixitais, a creación
dunha cota online ou o envío de arquivos por correo
electrónico. Ademais, poderán achegarse ás redes sociais e
desenvolver habilidades artísticas. O certame desenvolverase do 14
ao 18 de decembro, en horario de mañá. A exposición de fotografías
e a entrega de premios celebrarse o 22 de decembro, durante a xornada
Nadal: Sons e Recordos.
Ademais, e dentro da programación do terceiro
trimestre de actividades do InLugo en 2015, desenvolveranse dous
cursos do 14 ao 17 de decembro: Exercicio mental co ordenador
en horario de mañá e Fai das túas fotografías unha
felicitación de Nadal, en horario de tarde.