Industria aposta pola formación en software libre dende a universidade

O pasado sábado, día 18 de outubro, tivo lugar en Ourense, o acto de inauguración do Máster en Consultoría de Software Libre, do cal se encargou a directora xeral de Promoción Industrial e da Sociedade da Información, Helena Veiguela, quen deixou constancia “do compromiso decidido da Consellaría de Innovación e Industria coas tecnoloxías e os estándares abertos de cara ao desenvolvemento dunha economía do coñecemento propia”.
Segundo apuntou Veiguela durante a súa intervención no devandito acto, o esforzo do departamento autonómico oriéntase cara a unha “estratexia coherente para a potenciación do desenvolvemento do software libre na empresa galega” a fin de mellorar a competitividade da mesma e consolidar os cimentos que a forman.
A este respecto, o programa académico do curso de posgrao da Universidade de Vigo, dotará aos seus estudantes de competencias en consultoría de negocio e tecnolóxica ou en desenvolvemento de solucións e migración de datos, pasando pola interoperabilidade con sistemas propietarios ou a implantación de sistemas de seguridade e protección de datos.
Este máster, adaptado aos requirimentos do Espazo Europeo de Educación Superior (EEES), desenvolverase ao longo do curso 2008-2009 na Escola Superior de Enxeñaría Informática do Campus de Ourense e estruturará os seus contidos en torno a catro módulos: Tecnoloxías e frameworks de desenvolvemento de software libre, Ferramentas de software libre para intelixencia de negocio, Administración e Dirección das TIC e Seguridade e lexislación. A parte teórica do curso completarase, de xeito opcional, con prácticas en empresas.
O programa formativo está dirixido a un total de 30 titulados, preferentemente Enxeñeiros en Informática, Enxeñeiros Técnicos en Informática de Xestión e Enxeñeiros Técnicos en Informática de Sistemas.