INEO e AJE Pontevera únense para impulsar a creación de novas iniciativas TIC
venres, 24 de maio do 2013
A
asociación INEO e a Asociación
de Empresarios Novos de Pontevedra (AJE
Pontevedra) van unir forzas a prol do emprendemento
tecnolóxico-dixital na nosa terra. Así o deron a coñecer este
venres os respectivos presidentes das dúas entidades, Jorge
Cebreiros (INEO) e Lucía Pedroso (AJE Pontevedra), no acto de
sinatura oficial dun convenio dirixido a favorecer e impulsar a
creación de novas iniciativas TIC galegas ou ben contribuír ao
desenvolvemento das que estean a iniciar a súa andaina. Á
formalización deste acordo, celebrada este venres na sede viguesa da
Confederación de Empresarios de Pontevedra, asistiron tamén
(amosando o seu apoio total á alianza e ao que esta implica) os
presidentes da CEP, José Manuel Fernández, e de AJE Galicia, José
Manuel Valenzuela.
A
colaboración entre as dúas asociacións ten como obxectivo
concreto, segundo explicaron, impulsar o espírito de emprendemento
no sector TIC ou entre as compañías que empreguen as novas
tecnoloxías da información como alicerce tecnolóxico para
confeccionar a súa estratexia de negocio. Trátase pois “dun
paso en firme cara ao afianzamento deste eido como actividade-motor
do desenvolvemento empresarial, económico e social en Galicia”,
sinalaron. A xuízo de INEO e AJE Pontevedra, “as novas
tecnoloxías son unha ferramenta fundamental para o desenvolvemento
de calquera actividade de mercado”. En base a isto, INEO pon a
disposición de emprendedores e empresas noveis de AJE Pontevedra o
seu coñecemento e ampla experiencia no devandito ámbito. A patronal
de empresas TIC achegará, máis polo miúdo, asesoramento
tecnolóxico e funcionará como intermediaria entre os seus membros e
as empresas de AJE Pontevedra para procurar a solución que mellor
lle acaia ás necesidades destas. Nesa liña, executaranse tamén
programas formativos conxuntos sobre temas transversais para ámbalas
dúas entidades ou específicas das TIC. A maiores, colaborarán no
desenvolvemento de accións de divulgación e sensibilización
promovendo eventos de networking e proxectos de fomento da
creatividade empresarial.