Investigadores da UVigo conseguen pasar o último test do seu satélite HumSAT-D
mércores, 20 de marzo do 2013
- Fernando Aguado xunto cos alumnos da Universidade e varios técnicos da ESA
Temos que falar estes
días de novos achados galegos en materia de telecomunicacións. Máis
polo miúdo, en materia de desenvolvemento de satélites, un eido de
actividade no que xa teñen salientado, e moito, os investigadores da
Universidade de Vigo (responsábeis do XaTcobeo, aínda
en órbita e operativo). Pois ben, sen saírmonos da UVigo,
falamos agora do HumSAT-D, un desenvolvemento que vén de superar
positivamente o seu último test en Holanda, onde se atopa o equipo
de alumnos (Alberto González e Jacob López, Diego Nodar e Daniel
Docal) coordinado polo profesor Fernando Aguado, responsábeis do
proxecto. Este último test é
o derradeiro paso antes de que se aprobe o lanzamento, que
podería levarse a cabo no mes de maio dende Rusia.
Os investigadores
galegos atópanse arestora no European Space Research and Technology
Centree, centro que a Axencia Espacial Europea ten en Noordwijk,
Holanda. O seu obxectivo: realizar as probas finais de clasificación
de voo, que se centran en test de termo-baleiro, sometendo o satélite
tanto a altas como a baixas temperaturas para comprobar o seu
rendemento e resistencia. Até o de agora, informa a Uvigo, os
resultados están por riba mesmo do agardado. Os investigadores
regresarán a Vigo na Semana Santa e, se non hai cambio de última
hora, co visto bo da ESA baixo o brazo.
O satélite vigués
pertence á constelación HumSAT, da que forman parte satélites,
sensores e estacións de terra, e será posto en órbita polo foguete
Dnepr dende Rusia xunto con outros oito satélites que serán
enviados en tres lanzamentos distintos para estar en órbitas
complementarias para cubrir o maior tempo e superficie posible da
Terra. O HumSAT-D “é un satélite de comunicacións de baixa
órbita que serve para recoller datos de sensores de baixa potencia e
custe, uns 10 euros, que están localizados por todo o globo
terráqueo e que servirán para recoller datos como polución, etc…
que, a través dunha constelación de satélites, permite ter unha
rede mundial de seguimento a baixo prezo”, segundo explicaba
Fernando Aguado, coordinador do proxecto aeroespacial vigués. Entre
outras utilidades, permitirán monitorizar parámetros para estudar o
cambio climático en zonas sen infraestruturas de telecomunicación
ou eléctricas, así como a transmisións de información urxente en
situacións de emerxencia. O representante vigués nesta constelación
ten un peso de 850 gramos e percorrerá unha órbita circular a unha
altura constante de preto de 700 quilómetros.