La Voz de Galicia desembarca nas redes sociais

A emerxencia das plataformas de redes sociais leva aos medios tradicionais a buscar un oco entre as mesmas, e La Voz de Galicia decidiu comezar a dar uns pasos firmes en dúas das máis populares, coma son Facebook e Twitter, abrindo perfís en ambas.
En Facebook procurarán recoller as novas máis interesantes da edición dixital do xornal, así coma as entradas máis rechamantes dos seus blogueiros, mentres que Twitter será un medio para comentar as informacións máis destacadas e retransmitir os actos máis importantes da actualidade galega e española.
Haberá que facer un seguimento destas iniciativas co paso do tempo, pois aínda que cada vez sexa máis frecuente ler en medios tradicionais novas sobre as novas redes sociais, o papel da prensa nas mesmas aínda non é un rol ben definido.