Lalín lanza un mapa dixital con preto de 1.200 recursos patrimoniais rexistrados
mércores, 4 de xullo do 2018
A semana pasada o
Concello de Lalín presentou unha
nova iniciativa tecnolóxica para afianzar o municipio na primeira
liña dos municipios turísticos galegos. Trátase
dun novo mapa dixital que abrangue e mostra a longa e rica listaxe de
recursos patrimoniais que atesoura. A iniciativa, accesíbel a
través de turismo.lalin.gal,
foi dada a coñecer polo concelleiro de Turismo, Francisco Vilariño,
e máis os auxiliares municipais da dita área, Nuria Álvarez e
Martín Riádigos. En concreto, o mapa rexistra máis de de 1.176
elementos (igrexas, cruceiros, muíños, pontes, castros, mámoas,
petroglifos, pazos, fontes, fervenzas, etc...).
Segundo engadiron, a
ferramenta foi creada tirando proveito do servizo dixital Google
Maps, dando como resultado un recurso libre, de balde e utilizábel
dende calquera soporte informático ou trebello móbil con conexión
a Internet. Isto polo que se refire á vertente técnica, ao alicerce
tecnolóxico. No que atinxe ao fondo, o mapa elaborouse en base ao
inventario municipal de patrimonio etnográfico e turístico creado
polo Concello o ano pasado. “Con esta iniciativa”, sinalaron o
edil e máis os técnicos, “ademais de poñer en valor os múltiples
elementos patrimoniais de Lalín, localizámolos e describímolos”,
e todo co obxectivo de incrementar e mellorar as experiencias á hora
de visitalos”.
Francisco Vilariño
explicou que "agora mesmo non coñecemos ningún outro concello
que teña este tipo de ferramenta". O edil sinalou que o mapa
rexistra 1.176 elementos contabilizados actualmente e clasificados en
diferentes categorías:
· Bens relixiosos:
Igrexas e capelas (70), petos de ánimas (1), cruceiros (41).
· Arquitectura civil:
pazos (17), casas e casais (69), outros (6).
· Castros mámoas e
petroglifos: castros (31), mámoas e sartegos (42), petroglifos (11).
· Muíños, hórreos e
alvarizas: muíños (9), hórreos (774), alvarizas (24).
· Pontes, fervenzas e
fontes: pontes (8), fontes (9) e fervenzas (2).
· Esculturas (30)
· Miradoiros, áreas de
lecer e áreas naturais (31) e outros (11).
Finalmente o concelleiro
de Turismo puxo de relevo o traballo que está realizando o Goberno
de Lalín para “darse a coñecer tamén a través das redes e de
Internet”, como plataforma imprescindíbel na actualidade para a
promoción turística.