Lalín organiza un campamento para achegar a rapazada á creación de robots

O Concello de Lalín presentou onte a edición 2018 do seu Campamento Tecnolóxico, unha iniciativa que busca mellorar a oferta local de lecer formativo e, tamén, avanzar na incorporación das novas tecnoloxías nos procesos de aprendizaxe de nenas, nenos e adolescentes. Co fin de dar pasos relevantes neste eido do ensino e do fomento da creatividade (buscando tirar abaixo barreiras entre o talento de todos os participantes e a creación de tecnoloxías), farase especial fincapé na robótica educativa, que é un sistema de ensinanza interdisciplinaria que potencia o desenvolvemento de diferentes habilidades.
O Concello de Lalín pretende achegar esta disciplina aos nenos do municipio; con este fin propúxose a realización dun obradoiro de robótica dirixido a nenos e mozos con idades comprendidas entre os 8 e os 14 anos. No obradoiro ensinaránselle á rapazada as técnicas de programación de enxeños tecnolóxicos e porase o foco en fomentar o pensamento lóxico-dedutivo, en crear distintos supostos e en artellar relacións entre os sensores e motores. Segundo fixo saber o Concello, “a creación de robots permitiralle aos alumnos non só xogar coas súas creacións senón tamén aplicar os coñecementos adquiridos noutras disciplinas tales como as matemáticas ou a física”.
Achegaranse catro quendas, con 10 rapazas e rapaces por quenda (40 en total).
· Quenda 1 - 3, 4, 5, 6 e 7 de setembro de 10:00 a 14:00h.
· Quenda 2- 3, 4, 5, 6 e 7 de setembro de 15:30 a 19:30h.
· Quenda 3 – 26, 27 e 28 de decembro de 10:00 a 14:00h.
· Quenda 4- 26, 27 e 28 de decembro de 15:30 a 19:30h.
Respecto do prazo de inscrición, está aberto entre o 13 e o 27 de agosto, podéndose facer no rexistro de entrada do Concello de Lalín ou dende a sede electrónica. As xeiras de robótica celebraranse na Aula CeMIT, no Auditorio de Lalín. As actividades que se realizarán durante o campamento terán como obxectivo final a montaxe e programación de dous robots, mais en concreto estando enfocadas á programación co hardware libre Arduino.