Lanzados os novos bonos dixitais que facilitan ás persoas vulnerábeis a contratación de banda larga
martes, 18 de xullo do 2023
O
Diario Oficial de Galicia publicou este 18 de xullo a convocatoria
para a solicitude dos bonos dixitais para colectivos vulnerábeis do
programa estatal Único. O prazo abre este 19 de xullo e permanecerá
aberto ata o vindeiro 15 de novembro. O obxectivo desta iniciativa é
“facilitar a persoas ou familias en risco contratar ou mellorar a
conexión á banda larga fixa cunha velocidade mínima de 30 Mbps,
cunha minoración mensual de ata 20 euros na factura emitida pola
entidade colaboradora elixida, durante un período de ata 12 meses
cun máximo de 240 euros”.
Trátase
da segunda convocatoria dos bonos dixitais e conta cun orzamento de
1,34 millóns de euros, que forman parte dos fondos que o Goberno de
España transfire a Galicia no marco do compoñente 15 Galicia do
Plan de Recuperación, Transformación e Resiliencia, financiado pola
Unión Europea. A previsión é acadar nesta segunda convocatoria
arredor de 5.600 beneficiarios.
En
base ao especificado pola Unión Europea na súa decisión para a
aprobación destas axudas, o uso do bono para a mellora de velocidade
só será válido naqueles casos nos que a velocidade contratada
actualmente sexa inferior a 30 Mbps.
As
axudas están dirixidas a fogares que non conten con conexión fixa
de 30 ou máis Mbps a Internet e cuxa renda anual (per cápita) sexa
inferior ao 125% do IPREM en caso de non ter menores ou 175% en caso
de telos. “Son, fundamentalmente, beneficiarios de Risga, do
Ingreso Mínimo Vital así como outras familias con poucos recursos
ou risco de exclusión social”, explica a Xunta, engadindo que o
bono social forma parte das iniciativas predefinidas polo Goberno de
España no marco do programa estatal Único, que compromete ao Estado
a acadar o obxectivo europeo de que o 100% da poboación teña acceso
a servizos de banda larga de polo menos 100 Mbps, en 2025.
As
iniciativas predefinidas para todas as comunidades autónomas apenas
suman algo máis do 9% do orzamento do que dispón o Estado para
acadar este obxectivo (Galicia soamente xestiona un 0,5% dese
orzamento e faino con esas iniciativas xa establecidas).