Lideramos.gal impulsará o talento feminino galego e a formación en xestión de equipos
xoves, 28 de decembro do 2023
A
Xunta
puxo en marcha este mércores 27 de decembro o programa formativo
Lideramos, dirixido a impulsar o talento e liderado feminino e a
formación específica en xestión de equipos. Segundo se fixo saber,
máis dun cento de mulleres participarán nas distintas actividades
previstas deica o vindeiro 11 de abril. O programa terá unha forte
presenza web e vén acompañado dunha páxina, lideramos.gal,
que recolle todo o contido do proxecto, así como a ficha de
inscrición de cada colectivo e provincia.
Participaron
na posta en marcha oficial do programa o secretario xeral de Apoio ao
Emprego, Traballo Autónomo e Economía Social, Pablo Fernández,
xunto coa secretaria xeral da Igualdade, Sandra Vázquez, e a
directora xeral de Emprendemento e Apoio ao Emprego, Margarita Ardao.
Na
súa intervención, o secretario xeral destacou que a formación
estará composta por obradoiros e clases maxistrais en liña para os
distintos equipos de traballo e sesións de networking e
formación presencial nas catro provincias, co fin de abordar
diferentes temáticas e obxectivos de modo transversal. O programa
Lideramos, dixo, “céntrase así no fortalecemento de novos perfís
profesionais, no desenvolvemento do talento e na formación en
competencias brandas -especialmente na área de xestión de equipos-,
reforzando o compromiso da Xunta coa igualdade de xénero”.
Os
obxectivos do proxecto son os de reforzar o liderado feminino e a
competencia da xestión executiva en Galicia, co gallo de avanzar no
benestar nas empresas. Tamén “impulsar a interrelación entre
todas as participantes no programa, ofrecendo formación práctica en
xestión e liderado e mellorando as capacidades de liderado e
comunicación, destacando as fortalezas e talentos individuais”.
Así mesmo, promoverase o autocoñecemento e o desenvolvemento
persoal mediante sesións de adestramento individualizadas para saber
das principais forzas motivadoras dos diferentes equipos, así como
para alentalos a seguir progresando.
A
web do programa (www.lideramos.gal)
recolle todo o contido do proxecto, así como a ficha de inscrición
de cada colectivo e provincia. Esta web recollerá todas as
novidades, eventos e contidos de interese que se xeren durante o
transcurso da iniciativa nos diferentes grupos e accións. As persoas
interesadas en enviar calquera consulta poderán remitila ao correo
electrónico leadership@lideramos.gal.