Lugo acolle este xoves unha xornada sobre TICs ao servizo do noso agro

A Sociedade da Información, de non corrixilo, será nun futuro moi próximo privilexio de quen vive ao seu alcance. Ou sexa, de quen xa está nela con toda probabilidade. O resto dos sectores téñeno dobremente complicado: nin están nela, nin a teñen tan preto nin, de habela, é de tanta calidade. A maiores e para enlear un pouco máis as cousas, os datos cos que contan das vantaxes e ferramentas das novas canles da comunicación son moitas veces menores cós dos sectores máis dixitalizados. Traballar para corrixir este punto é un do obxectivos da sétima e última xornada do Proxecto EmprendeTIC 2009: A implantación das TIC no medio rural. Todo o que preciso coñecer para mellorar a produción das explotacións mediante as novas tecnoloxías.
O evento, organizado pola Fundación CEL e AFRICOR Lugo na Sala de Innovación Tecnolóxica da primeira entidade, vai dirixido a informar polo miúdo das aplicacións informáticas e plataformas web máis útiles para mellorar a rendibilidade do subsector gandeiro.
A xornada, que terá o apoio da Obra Social de Caixa Galicia e da Fundación Feiras e Exposicións de Lugo, contará coa presenza de profesores do Instituto de Secundaria As Mercedes, responsables xuntos cos seus alumnos do desenvolvemento dun sistema para a produción de auga quente sanitaria e calefacción a través da recuperación da calor nun tanque de leite.
Asemade, participarán na sesión divulgativa os responsables da firma lucense XAN (deseñadora dun prégama informático para a xestión integral das explotacións de gando), de AFRICOR Lugo (que conta cunha plataforma de balde para o control leiteiro), da empresa Moroán (que centra o seu traballo na aplicación da tecnoloxía analítica NIR nas explotacións gandeiras) e a firma Lugo IGN, especializada na achega de servizos para a xestión innovadora e de empresas e institucións.
A previsión dos organizadores é reunir a preto de 200 persoas de toda a provincia. A xornada comeza este xoves 19 ás 9.30 horas, e os relatorios iranse desenvolvendo o salón central do Pazo de Feiras e Congresos de Lugo, sendo o devandito SITE o emprazamento para as demostracións de software.
Ás 13.30 horas está previsto un acto de clausura institucional.