Lugo impulsa con incentivos a contratación do alumnado dos obradoiros municipais TIC
mércores, 23 de agosto do 2023
O Concello
de Lugo fixo un chamamento ás empresas locais para solicitaren as
axudas de 1.500 euros para a contratación do alumnado do obradoiro
Lugo Sustentábel 5.0, que se está a impartir de forma
presencial nas dependencias municipais do CEI Nodus. “O obxectivo
destes incentivos é facilitar a inserción laboral das persoas que
se están a formar no ámbito das novas Tecnoloxías da Información
e a Comunicación, a mercadotecnia e a comunicación”, explicou a
rexedora, Lara Méndez.
O obradoiro, que chegará ao seu remate –logo de
12 meses– a finais se setembro, está organizado pola área de
Dinamización Económica e, durante o seu desenvolvemento as e os
participantes están a recibir o salario mínimo interprofesional.
No obradoiro están matriculados 15 alumnos, de
entre 26 e 69 anos. Conta con tres especialidades formativas:
Desenvolvemento de aplicacións con tecnoloxías web (5
alumnos); Desenvolvemento de produtos audiovisuais multimedia
interactivos (6 alumnos); e Xestión de marketing e relacións
públicas (4 alumnos). As accións propostas contemplan a
obtención do certificado de profesionalidade de Nivel 3.
“Tendo en conta o perfil do estudantado, o
obxectivo é facilitar a súa reincorporación ao mercado de
traballo, nun segmento profesional novo para moitas e moitos
deles e cunha ampla demanda de profesionais”, incidiu Méndez.
Pola súa banda, o tenente de alcaldesa de
Dinamización Económica, Mauricio Repetto, sinalou que os incentivos
á contratación temporal por conta allea xa espertaron o interese
dalgunhas empresas lucenses. “Teñen por finalidade facilitar a
empregabilidade e ocupabilidade das persoas participantes no
obradoiro, xa que a contratación temporal terá unha duración
mínima de 3 meses a tempo completo e deberá comezar nos quince días
seguintes á finalización do mesmo, o vindeiro 29 de setembro”,
indicou.
Repetto Morban informou tamén de que o prazo de
solicitudes permanecerá aberto até o 8 de setembro. “Poderán ser
entidades beneficiarias destes incentivos á contratación as persoas
empregadoras e as empresas, calquera que sexa a forma xurídica que
adopten, incluídas as persoas autónomas, as sociedades civís e as
comunidades de bens, aínda que carezan de personalidade xurídica,
cuxa actividade estea directamente relacionada coa formación
impartida no Obradoiro de Emprego”, afirmou o edil.
Os contratos temporais incentivaranse cunha
subvención fixa de 1.500 € por cada traballador/a, correspondente
ao contrato mínimo de 3 meses a xornada completa.
Toda a información atópase na páxina
web municipal, onde tamén se encontra o formulario de solicitude
que deben presentar.