Máis da metade da poboación e das empresas de Amoeiro xa dispoñen de fibra de Movistar

Exterior da Casa Consistorial de Amoeiro, en Ourense

Máis da metade das unidades inmobiliarias (vivendas e locais) do concello de Amoeiro en Ourense, concretamente o 52% das mesmas, xa conta con cobertura de fibra óptica de Movistar. Máis polo miúdo, a fibra até o fogar da operadora (FTTH polas súas siglas en inglés) chegou xa a 277 fogares e empresas das localidades de Gilfonxe, Cornoces, Parada e Trasalba, que veñen de sumarse ás 582 que xa dispoñen desta tecnoloxía nos núcleos de Amoeiro e Bóveda, o que supón, como dixemos un 52% da cobertura do municipio.
A posta en cobertura destes fogares, que xa foi comunicado ao alcalde do municipio, José Luis González, achega á poboación as vantaxes da fibra de Movistar, entre as que se atopa “voz con alta calidade nas chamadas, máxima velocidade de conexión a Internet en varios dispositivos (malia que se conecten de xeito simultáneo), calidade óptima nos xogos en redes e, de dispor o domicilio de Movistar+, canles de alta definición.
O despregue nos novos fogares que entran agora en cobertura está impulsado polo Ministerio de Economía a través do Plan Nacional de Extensión de Banda Larga de Nova Xeración (PEBANG). Telefónica continúa así coa que é, nas súas palabras, “unha firme política de colaboración público-privada para situar a Galicia á vangarda en infraestruturas de telecomunicacións de última xeración”. A finais de 2019, o 40% da poboación da provincia de Ourense contaba con cobertura de fibra óptica ( FTTH) de Movistar, o que supuxo un total de 107.298 vivendas e negocios e un 23,78% máis que no exercicio anterior. A previsión é que na provincia de Ourense entren este ano en cobertura outras 47.574, tamén en núcleos dispersos e orograficamente complexos, aumentando en máis dun 44,34% a poboación da provincia que poderá gozar da fibra óptica de Telefónica.