Máis de cen persoas participaron no convite online á lectura da Deputación da Coruña
xoves, 13 de setembro do 2018
Facer unha foto do teu recanto de lectura
preferido e compartilo nas redes sociais ten premio. Esta foi a base,
precisamente, do concurso #hoxeleoen promovido pola Biblioteca e a
área de Turismo da Deputación da Coruña, que vén de dar a coñecer
o nome da súa gañadora e mailo galardón co que se premia a súa
afección ás nosas letras. Trátase
de Zaida Panadero Álvarez, de Ferrol, que obtivo unha viaxe
literaria a París para dúas persoas. A foto gañadora do
concurso, achegada por Zaida, consistiu nunha instantánea de Ferrol,
co mar de fondo e o libro Ollos de auga de Domingo Villar en
primeiro plano.
Segundo informou a Deputación da Coruña, o
concurso tivo o obxectivo de animar a “ler como parte da viaxe e as
vacacións”, e nesta convocatoria participaron finalmente máis de
cen persoas.
O acto de entrega do premio desenvolveuse este 12
de setembro na propia Biblioteca da Deputación da Coruña. Fixeron
acto de presenza o deputado de Turismo Xosé Regueira Varela, a xefa
de Sección de Turismo Mª Teresa Loureiro Ventureira, e a Arquiveira
Bibliotecaria, Mª Dolores Liaño Pedreira.
Segundo detallaron, o concurso de verán tivo como
obxecto a dinamización e animación á lectura, así como a difusión
do patrimonio paisaxístico e cultural dos concellos da Coruña.
As persoas participantes remitiron a través das
redes sociais e do correo electrónico fotografías dos seus
recunchos a preferidos para ler este verán, xunto coas lecturas das
que estaban a gozar.
Entre tódalas fotografías participantes, que nesta edición
foron 103, sorteouse unha viaxe a París.