Máis de medio cento profesionais participaron na xornada sobre drons celebrada en Mariñán
luns, 20 de outubro do 2014
- José Manuel Miranda de Aerial Works durante a demostración práctica
Cada pouco (cada moi
pouco) xorden e afiánzanse tecnoloxías que amosan capacidades case
infinitas de explotación e uso empresarial. Unha das máis
rechamantes deste último ano é sen dúbida a tecnoloxía dos
vehículos aéreos non tripulados, tamén coñecidos como drons,
usados cada vez máis en labores de loxística, transporte,
seguimento, rexistro de terreos e contornas e, tamén, en materia de
publicidade e mercadotecnia. Para dar conta das súas
particularidades e posíbeis aplicacións na nosa terra, a Factoría
de Innovación da Coruña organizou a semana pasada o evento
Innova utilizando drons, que se celebrou no Pazo de Mariñán
(Bergondo) e que deu acollida a máis de cincuenta profesionais de
toda a provincia.
Entre outras cousas, o
encontro serviu para pór de manifesto a tendencia destes aparellos
(nun principio destinados a usos militares) a estar cada vez máis
presentes nas nosas vidas. En parte debido ao abaratamento da
tecnoloxía que os fai posíbeis, en parte polas facilitades das
normativas (sobre todo as estranxeiras) ao respecto. “As
previsións”, sinalouse, “apuntan a que nun prazo de dous anos os
drons cheguen a xerar preto de 2.000 millóns de euros a nivel
mundial”.
Tras realizar un repaso
desde a orixe dos aeromodelos até a chegada destes vehículos
aéreos, Miguel Ángel García, presidente do club de voo As
Gaivotas, compartiu cos asistentes diferentes exemplos de como unha
ampla variedade de sectores xa están a sacar partido a esta
ferramenta. Entre outros, destacou o uso destes aparellos en eidos
como o audiovisual, a seguridade, a prevención e extinción de
incendios, a topografía e cartografía ou o turismo.
Juan Moya, responsábel
do departamento VANT de Zumain Enxeñeiros, proseguiu o vieiro aberto
polo anterior relator amosando algúns dos proxectos que a súa
compañía desenvolveu grazas ao uso de diferentes modelos de drons
en topografía, agricultura ou fotografía, entre outros. Segundo
dixo, “o traballo con estres trebellos permitiu incrementar ou
mellorar servizos, ofrecendo maior calidade aos clientes e sendo máis
competitivos con respecto a outras empresas”. Por outra banda,
Ángel del Real, responsábel de adestramento de tripulacións de
Swiftair, foi o encargado de presentar o ámbito normativo en vigor e
insistiu na necesidade de que se aprobe “canto antes un novo marco
legal específico para os drons, xa que as súas características e
aplicacións non teñen cabida dentro das leis de aviación
existentes e a falta dun desenvolvemento lexislativo apropiado en
España está a restar competitividade ao sector”. A actividade
pechouse cunha demostración práctica na que José Manuel Miranda de
Aerial Works, explicou o funcionamento destes aparellos e profundou
nas particularidades do seu uso e mantemento.