Máis do 76% dos concellos galegos contan con software libre nos computadores de usuarios
martes, 25 de novembro do 2014
O Observatorio da
Sociedade da Información e Modernización de Galicia (OSIMGA) vén
de emitir un novo diagnóstico sobre o estado de saúde do software
libre na nosa terra, desta volta centrándose no seu comportamento a
nivel das administracións locais. Os datos achegados polo organismo
dependente de AMTEGA semellan en xeral positivos, xa
que sinálase que o 80% dos concellos dispón de programas abertos
nalgún equipo informático, ben sexa en ordenadores de usuario
ou servidores.
As vantaxes disto
baséanse no seguinte: as ferramentas informáticas de código aberto
adoitan ser de menor custe cás privativas (co ingrediente de
idoneidade que isto supón, e máis para un ámbito onde se moven só
cartos públicos), ofrecen máis marxe de adaptación e non implican
o pago de licenzas, ao que cómpre engadir que a súa inclusión
satisfai as demandas dunha comunidade de usuarios crecente.
No informe tamén se
sinala que máis do 76% dos municipios contan con software libre nos
computadores de usuario, ben como única tipoloxía de software
habilitada nos equipos (2,9%) ou ben en presenza de software
privativo (75,6).
Do total de concellos
que teñen servidores, o 45,4% dispón de software libre instalado,
ben como única tipoloxía de software (3,9%) ou ben en combinación
con software privativo (43,9%).
Por tamaño dos
concellos, o 92,7% dos que teñen máis de 5.000 habitantes dispón
de recursos abertos nalgún dos seus equipos informáticos, o que
implica unha diminución respecto ao 2011 onde o valor situábase no
96,4%. No caso dos concellos con máis de 50.000 habitantes, o 100%
dispón de software libre e de software privativo simultaneamente nos
equipo informáticos.
A investigación tamén
indica que “o emprego de software libre nos equipos de usuario dos
concellos é superior nas aplicacións que nos sistemas operativos,
cunhas porcentaxes do 67,7% e 30,4% respectivamente”. No referente
a servidores, a presenza de aplicacións informáticas libres é
superior á de sistemas operativos libres. “Se ben, as diferenzas
son menores que no caso de ordenadores de usuario”, explícase.
Polo que atinxe ás aplicacións informáticas de uso xeral, “a
combinación de software libre e software privativo é a opción máis
habitual no caso de ofimática, navegador de Internet e xestor de
correo electrónico”. No referente ao antivirus e seguridade, a
tipoloxía máis habitual é a de software privativo, cousa por outra
banda lóxica se temos en conta que os sistemas abertos non adoitan
ter os problemas de incursións víricas que si soen afectar aos
computadores con ferramentas privativas. A mellor porcentaxe de
dispoñibilidade de software libre está no navegador de Internet, en
exclusividade no 20,2% e xunto co software privativo no 68,5% dos
ordenadores.
En canto á valoración
global, tanto o software libre coma o software privativo “obteñen
unha puntuación semellante e con valores próximos aos 7 puntos”.
No caso de software libre, os valores oscilan entre o 6,5 para
concellos de máis de 50.000 habitantes e o 7,2 dos concellos de
entre 20.001 a 50.000 habitantes. No que se refire a previsións a
curto prazo, no 80% das entidades locais agardan aumentar ou manter a
presenza de ferramentas de código aberto. “No caso dos
ordenadores de usuario 4 de cada 10 concellos cren que aumentará,
mentres que no caso dos servidores a tendencia semella máis
inclinada a seguir nos niveis de uso actual”, engádese.