MediaMapa.gal recolle os datos de case 150 medios de todo o territorio galego
xoves, 2 de febreiro do 2017
A
semana pasada, tal
e como sinalamos dende Código Cero, arrincou con forza a
iniciativa MediaMapa.gal,
un dos proxectos financiados pola Bolsa
Nacho Mirás para novas/os
tituladas/os
do 2016, organizada e desenvolvida polo Colexio Profesional de
Xornalistas de Galicia e patrocinada por Abanca, coa colaboración da
Facultade de Ciencias da Comunicación da Universidade de Santiago.
Como
lembraremos, MediaMapa.Gal diríxese a construír unha cartografía
do conxunto dos medios de comunicación en Galicia (o seu elemento
máis referencial é, de feito, o Mapa
dos medios galegos, que
recolle arestora información de 150 deles).
Esta
construción non será o desenvolvemento dun labor calquera, feito
por unha equipa concreta especializada, senón que será unha
construción aberta, participativa e dinámica.
Segundo
nos recordou esta semana o Colexio, o mapa interactivo onde figuran
as iniciativas xornalísticas da nosa terra “é un espazo aberto no
que calquera usuario poderá introducir novas achegas”. Ademais, poderá localizar as canles activas,
ver as súas características básicas e acceder de xeito directo a
elas.
Como
dixemos,
MediaMapa.Gal irrompe
no escenario dixital galego con
datos de case 150 medios de todo o noso
territorio,
emprazados de
maneira xeográfica
e clasificados polas características de grao de proximidade
(municipal, comarcal, provincial ou comunitario), tipo de medio
(prensa, radio ou televisión), soporte (papel, web, radio ou
televisión), temática (especializada ou xeralista)
e idioma de edición (castelán, galego ou portugués). Desde as
fichas dos distintos medios pode accederse aos seus respectivos
sitios web, así como consultar os datos de denominación social e
área de cobertura.
Como
sinalamos o outro día, MediaMapa.gal
está promovido por Cruz Negreira, xornalista e doutoranda en
Comunicación e Información Contemporánea na Universidade de
Santiago de Compostela, que investiga, dentro do grupo de
investigación Novos Medios da USC, sobre o desenvolvemento dos
medios hiperlocais na rede, en Galicia e no conxunto do Estado.
Segundo
engade o Colexio de Xornalistas, MediaMapa.Gal
“servirá tamén para difundir parte dos resultados desta
investigación, que se publicarán en aberto e de forma periódica no
sitio”.