Melide celebrará unha xornada sobre radio libre
mércores, 21 de outubro do 2015
O vindeiro venres terá lugar no IES de Melide, a I Xornada de Radio Libre,
encontro que recollerá charlas para falar do mundo da radio, e obradoiros para
amosar as posibilidades do software libre á hora de gravar, producir ou
difundir música e contidos radiofónicos.
A entrada é libre e de balde, recomendándose aos interesados en participar que o comuniquen previamente por correo
electrónico á organización do encontro.
A xornada que comeza ás 9:00 horas, está organizada en sesións de tarde e mañá,
e consta dun programa
que podemos consultar íntegro en liña e que conta con diferentes
actividades para diferentes públicos (tanto xuvenil, como para adultos) como as
seguintes:
- Charla sobre o uso das licenzas libres
para publicar contidos, relator Rafael R. Gaioso.
- Diferentes obradoiros de iniciación
radiofónica, impartidos por Laboratorio
de Radio
- Primeiros pasos con Ubuntu Studio e AV
Linux, relator Jorge Lama.
- Pechará a xornada o obradoiro “Facendo
música con software libre”, impartido por Miguel Ángel Rodríguez Muíños.
Esta iniciativa enmárcase no convenio de colaboración asinado entre a AMTEGA e MeLiSA para a realización de actividades de
fomento do software libre en Galicia que forman parte do Plan de Acción en Software Libre 2015.