Microsoft di adeus aos seus móbiles KIN

Para o outono estaba previsto o lanzamento dos móbiles KIN ONE e TWO en Europa, pero finalmente non concretarase o desembarco destes prometedores terminais porque Microsoft decidiu pechar o seu desenvolvemento ante a súa mala acollida nos EE.UU., onde en 6 semanas terían vendido unhas 500 unidades, o que claramente non compensa o seu desenvolvemento e soporte, polo que a compañía de Redmond centrarase no futuro Windows Phone 7.
Estes terminais estaban enfocados para un público mozo, dando moitas prestacións de móbil de alta gama a través dun terminal de gama media, optimizado para un consumo de datos reducido, o que non souberon entender as compañías que o comercializan, pois vendíase cun contrato con tarifa de datos cuns prezos realmente elevados (29,99 dólares/mes) e cun compromiso de permanencia pouco razoable (24 meses), o que parece afastarse bastante das posibilidades do público obxectivo deste tipo de dispositivos.