Microsoft di que o 61% dos computadores con software pirata está infectado por software malicioso
mércores, 30 de abril do 2014
Microsoft desvelou este
martes 29 os resultados dun estudo desenvolvido pola consultora IDC e
a Universidade de Singapur (editado en
pdf) no que se calcula que este ano en curso as empresas gastarán
preto de 491.000 millóns de dólares por problemas se seguridade
ligados á presenza de software malicioso (malware) presente
en software pirateado (que non libre, moito ollo, senón copiado e
distribuído de orixinal protexido e privativo e sen pago previo). O
estudo auspiciado por Microsoft, unha nova tentativa da compañía a
prol de fortalecer as vendas legais dos seus produtos, baséase en
palabras do xigante de Redmond no seguinte feito incontestábel: non
hai maneira de defender dos ataques aos usuarios de software
privativo se non é con software auténtico e coas actualizacións
que del se derivan.
Segundo engade a
compañía, “é moi importante que os usuarios e compañías
dispoñan de programas legais nos seus equipos, que lles permita
previr e evitar perdas económicas e danos na súa imaxe”. Entre as
principais conclusións que se desprenden do estudo, realizado por
IDC e a Universidade Nacional de Singapur a nivel mundial, a empresa
salienta tamén a seguinte: os consumidores e as empresas teñen unha
posibilidade entre tres de ter que enfrontarse á presenza nos seus
sistemas de malware, asociado á instalación de software
pirata nos seus equipos ou a través da compra de PCs con software
pirata preinstalado. Ademais, IDC e Microsoft calculan quen da
devandita cifra de gasto de 491.000 millóns de dólares, 127.000
millóns de dólares irán destinados a xestionar problemas de
seguridade e 364.000 millóns de dólares para manexar a exposición
de datos privados e brechas de seguridade. Por outra banda, tamén se
di que o 30% das persoas que recoñecen usar software pirata, sofren
problemas de seguridade.
Para realizar o estudo, a
Universidade de Singapur instalou programas ilegais en 203
computadores novos. A raíz disto, detectouse que o 61% dos equipos
atopábase infectado por troianos, vermes, virus, rootkits ou
adware. Ademais, a investigación de IDC achou que o 27% dos
traballadores enquisados instala decote software nos dispositivos das
súas empresas sen o coñecemento nin a supervisión destas, “o que
incrementa o risco de infección por malware nos sistemas
corporativos”.