Millóns de contrasinais de usuarios de LinkedIn aparecen na Rede

Nos últimos días emerxeron na Rede millóns de contrasinais de contas de usuario de LinkedIn, e aínda que só se puxeron en circulación publicamente 6,5 millóns de contrasinais cifrados, aseguran que están a tratar de vender os enderezos de correo electrónico e os contrasinais de 117 millóns de contas de usuario que terían sido subtraídas en 2012, de aí que dende LinkedIn tivesen que admitir o fallo na súa seguridade e anunciar que comezaron a invalidar os contrasinais anteriores á intrusión padecida, de xeito que os usuarios que puidesen estar ameazados recibirán unha mensaxes instándoos a reiniciar os seus contrasinais.
Dende LinkedIn lembran a necesidade de mudar os contrasinais con frecuencia para evitar problemas (recomendado tamén empregar contrasinais fortes e activar a verificación en dous pasos), convidando aos seus usuarios a mudalos seus aínda que non reciban notificación pola súa banda. Tamén salientan que están a prestar unha especial atención ás contas de usuario vulneradas, para ver se detectan actividade sospeitosa nas mesmas, para así tomar medidas para identificar e bloquear as accións ilexítimas.