Mo-Yuen Chow di na Uvigo que as Smart Grids serán unha revolución equivalente á de Internet
martes, 6 de maio do 2014
Como avanzamos onte a
primeira hora, a Escola de Enxeñaría Industrial contou no mediodía
deste luns coa presenza dun dos principais persoeiros internacionais
da investigación arredor de Smart Grids ou Redes Eléctricas
Intelixentes (REI), o profesor Mo-Yuen Chow, que estivo na devandita
escola da Universidade de Vigo para
impartir un seminario sobre estas tecnoloxías e o seu futuro (un
futuro do máis esperanzador tendo en conta o seu potencial para
racionalizar e facer máis eficiente o consumo eléctrico) e tamén
para visitar varios dos laboratorios deste centro académico. Segundo
informa a UVigo, o profesor Mo-Yuen Chow, un dos dez investigadores
máis prestixiosos de EE UU, dixo que as Redes Eléctricas
Intrelixentes suporán os anos vindeiros o que Internet na década
dos noventa.
Ao fío disto, o
profesor equiparou a situación actual das Smart Grids ao Internet
dos anos 80, “cando estaba todo por facer, todo por coñecer, e non
se sabían todas as potencialidades da rede”. E continuou: “Do
mesmo xeito que Internet, as Smart Grids son tamén unha fonte de
enormes oportunidades económicas e tecnolóxicas….”.
Segundo explicou, o das
REI é un eido de investigación que abrolla da conxunción dos máis
innovadores desenvolvementos de enxeñaría eléctrica cos avances
das novas tecnoloxías da información. En definitiva, falamos de
optimizar e facer máis eficaz a xeración e fornecemento de
subministro eléctrico, poñendo en xogo sistemas únicos de xestión
para realizar usos eficientes e racionais da enerxía. En palabras do
investigador convidado estes días pola Universidade de Vigo, “do
que se trata é de tirar proveito das posibilidades tecnolóxicas que
existen hoxe en día, tanto de xeración de enerxía eléctrica como
de comunicacións”.
Máis polo miúdo,
explicou, estamos ante unha situación que deixou definitivamente
atrás os sistemas nos que xeradores e distribuidores de enerxía
eran os que a xeraban e a enviaban aos usuarios para instalarnos xa
nun estado de cousas no que, grazas aos novos avances tecnolóxicos,
“é posible que os usuarios tamén interveñan e creen un fluxo de
enerxía en ambos sensos, tanto desde o xerador cara os usuarios,
como desde os usuarios ata a propia rede”. E engadiu: “Falo por
exemplo das enerxías renovables, nas que os usuarios non só
consumen electricidade, senón que tamén a producen”.
Lembrar que Mo-Yuen
Chow é catedrático na Universidade de Carolina do Norte e profesor
tamén da Zhejiang University, unha das mellores universidades chinas
na área de enxeñaría.