Modernización destaca a capacitación e solvencia das empresas galegas de software libre
mércores, 17 de novembro do 2010
A Asociación
de Empresas Galegas de Software Libre (Agasol), en colaboración coa Secretaría Xeral
de Modernización e Innovación Tecnolóxica, vén de celebrar, esta mesma mañá en
Santiago de Compostela, a
I Xornada (R) Evolusión Cara Modelos de
Negocio Baseados en solucións TIC de Código Aberto, na que as pequenas e
medianas empresas do noso país dedicadas ó software libre demostraron a súa capacidade
competitiva fronte a empresas doutras Comunidades e dedicadas a outros
menesteres.
Esta xornada, que entre outras cousas tiña
como obxectivo situar o contexto do software libre, as
súas características como produto e o mercado que existe ao seu arredor, foi
inaugurada polo subdirector
xeral de Calidade, Interoperabilide e Seguridade da Secretaría Xeral, Jaime
Barros, quen destacou que “o tecido TIC
galego especializado en software libre ofrece produtos punteiros, e servizos da
máis alta calidade e solvencia”.
Na súa intervención, Barros tamén fixo
fincapé na “alta capacitación coa que
contan as empresas de software libre galegas, demostrada, segundo afirmou, coa presenza internacional de software libre
desenvolvido en Galicia ou o alto nivel de colaboración dentro do sector”.
O subdirector xeral de Calidade indicou que a decisión de abordar a promoción e fomento das tecnoloxías de software
libre e de fontes abertas (FLOSS) pola Xunta de Galicia “non é algo unicamente interno ao Goberno galego, senón que busca a
colaboración con todos os axentes implicados no ecosistema galego do FLOSS”; e
neste senso, lembrou que a Secretaría
Xeral de Modernización e Innovación Tecnolóxica mantivo reunións con todos os
axentes ao longo do 2009 e do 2010, dando como froito un Plan Operativo que
contempla ata 21 accións para promover o uso do FLOSS na Administración, na
cidadanía e nas empresas galegas.
O acto
contou con profesionais da talla de José María Lancho Rodríguez (avogado e
escritor dedicado ao campo do dereito das novas tecnoloxías), Agustín Benito
Bethencourt (cordinador de ASOLIF, de
Software Libre), Fernando Vázquez (director General de Imatia e fundador do
grupo DASA da Universidade de Vigo) e Javier Vázquez (CCO en eBox Technologies,
creador dun Servidor Linux para pemes) os cales debateron sobre as diferenzas
dos ciclos de vida dun produto de software aberto en contraposición cun de
software pechado, entre outras cousas.