Modernización destina 10 millóns de euros a incentivar o uso das TIC
venres, 23 de abril do 2010
A Secretaría
Xeral de Modernización e Innovación Tecnolóxica, da man de Mar Pereira, vén
de anunciar que este ano desenvolverá un programa de axudas á empresa dixital e
ao sector TIC do noso país, cunha dotación de preto de 10 millóns de euros, que
axudarán a facer realidade moitos dos proxectos tecnolóxicos que as entidades tiñan
entre mans e que non chegaron a facer por falta de fondos, permitindo que
poidan competir en igualdade de condicións con outras empresas máis solventes.
Este orzamento repártese
en catro liñas de actuación, das que dúas, a empresa dixital e o sector TIC concentran
a maior dotación económica con 8 millóns de euros. Os dous millóns de euros
restantes destinaranse ao fomento dos contidos dixitais e ás entidades sen
ánimo de lucro.
A secretaria
xeral de Modernización e Innovación Tecnolóxica, Mar Pereira, e o subdirector
xeral de Desenvolvemento da Sociedade da Información, Cristóbal Varela,
mantiveron recentemente unha xuntanza informativa cos representantes das
empresas do sector para abordar polo
miúdo o alcance destas convocatorias e atender as dúbidas que puideran
presentarse.
O departamento
autonómico publicará proximamente as axudas para a
empresa dixital e o sector TIC, e destinará 5.375.748 euros a subvencionar
proxectos de cooperación para o fomento da empresa dixital. As iniciativas que
se presenten, segundo apuntan dende a entidade pública, “deberán abordarse
desde a cooperación entre empresas e contar cun promotor que lidere o proxecto
demandando novos produtos e servizos das Tecnoloxías da Información e a
Comunicación e, a lo menos, cun socio tecnolóxico con capacidade para prestar
eses servizos ou produtos”.
A convocatoria
de axudas contempla, asemade, actuacións subvencionables, tanto na demanda
empresarial en solucións TIC como na resposta tecnolóxica en solucións TIC. A
primeira opción está orientada para que as empresas e asociacións empresariais
de calquera sector económico poidan identificar tarefas, problemas e situacións
concretas da súa actividade empresarial que necesitan novos produtos e servizos
das Tecnoloxías da Información e a Comunicación. No segundo caso, as
subvencións para a resposta tecnolóxica en solucións TIC está destinada a
empresas que desenvolven a súa actividade económica especificamente no ámbito
das Tecnoloxías da Información e a Comunicación para que poidan poñer en marcha
novos produtos e servizos que resolvan tarefas, problemas e situacións
concretas da actividade empresarial da entidade líder do proxecto de cooperación.
Axuda
específica para o sector TIC
A Secretaría
Xeral de Modernización potenciará o
desenvolvemento do sector empresarial da sociedade da información cunha achega
de 2.550.000 euros. Esta convocatoria contempla dúas liñas de axudas: a das capacidades TIC a dos desenvolvementos
TIC, nas que se terán en conta aquelas novas prestacións centradas en áreas
tecnolóxicas e en actuacións que redunden en beneficio dos cidadáns. No primeiro
caso, as iniciativas que se presenten deberán achegar novidades nalgunha das
seguintes áreas: converxencia e accesibilidade IP; mobilidade, localización e GIS (sistemas
de información xeográfica); avance na TDT; eficiencia enerxética; mellora do fogar
dixital; novas utilidades TIC aplicadas ao transporte, loxística ou sector
marítimo que aumenten a eficiencia e seguridade ou acaden unha integración
entre outras tecnoloxías.
Os
proxectos que se centren na mellora das actuacións de interese xeral para os
cidadáns a través das TIC deberán orientarse aos servizos sociais e sanitarios,
desenvolvendo aplicacións para a prestación e xestión de actuacións,
especialmente as relacionadas coa saúde ou a dependencia (teleasistencia,
servizos e dispositivos de localización, de alarma, etc.); a educación,
mediante ferramentas de creación de contidos dixitais, plataformas de
aprendizaxe on-line, plataformas de control do alumnado na aula, ou outros
ámbitos de servizos electrónicos de interese xeral, non necesariamente
vencellados á Administración.