Monet Tecnoloxía e Innovación obtivo o galardón ao mellor emprendedor da man de AJE-Vigo
luns, 10 de novembro do 2014
Monet
Tecnoloxía e Innovación, unha das iniciativas abeiradas
á plataforma aceleradora Galicia Open Future de Telefónica,
obtivo a semana pasada un importante recoñecemento: o Premio Novo
Emprendedor que concede a asociación
AJE Vigo. A empresa galega, con sede en Nigrán e posta en marcha
por tres enxeñeiros de Telecomunicación, céntrase en boa medida na
investigación e desenvolvemento de novos produtos e servizos
tecnolóxicos para o sector vitivinícola. Por exemplo: unha
plataforma web que
permite que as adegas poidan controlar o viñedo desde calquera
dispositivo móbil.
Ademais do trofeo que o
acredita como gañador, José David Rey, un dos impulsores de Monet,
recibiu un máster en estratexia dixital, mercadotecnia en liña e
comunicación 2.0 valorado en 12.000 euros e achegado por IFFE
Business School, entidade internacional de formación de posgrao en
dirección e xestión.
Volvendo a Monet e á súa
plataforma web, sinalar que con este recurso, unha explotación de
viño ten na súa man un control total sobre os parámetros
ambientais que atinxen á uva e a súa calidade final, fornecendo
partes do tempo avaliados polos responsábeis de 4gotas.com.
O resultado disto e doutras fontes de información pon ao responsábel
dunha empresa vitivinícola en situación de predicir calquera risco
relacionado cos seus viñedos, de xeito que terá marxe de abondo
para aplicar as medidas fisiosanitarias preventivas que considere
precisas e axeitadas.
No que se refire ao
certame de AJE-Vigo, sinalar que tamén resultou distinguida a
iniciativa Óptima Cleaning & Healthcare, que recibiu o premio
Novo Empresario 2014. Trátase dunha empresa centrada na fabricación
de produtos químicos e cosméticos para hixiene en diferentes
sectores como veterinaria, industria alimentaria, motor, industria e
coidado persoal. José Antonio Redondo recolleu o trofeo e un cheque
por valor de 2.500 euros achegados por Abanca.
Os dous gañadores
pasarán directamente a ser finalistas dos Premios Novo Empresario e
Emprendedor de AJE Galicia que se fallará o próximo 9 de decembro
en Ferrol.
Dentro da categoría
Mellor Empresario repartíronse tres accésit. O de Calidade foi a
parar a Conservas Chanquete, empresa de pratos preparados en conserva
de alta calidade, que gañou un bono de sete horas ofrecido pola
Consultora FielsGo! para axudar á empresa a desenvolver e planificar
a súa estratexia comercial; o accésit de Innovación foi outorgado
a Kemegal, compañía dedicada á fabricación de produtos químicos
para hixiene e limpeza, que recibiu un bono de 500 euros en solucións
gráficas e mercadotecnia achegada por Reprogalicia; e o accésit que
valoraba a aposta pola Responsabilidade Social Empresarial foi para
No Llores Patito, tenda online de produtos para bebés e
nenos, que obtivo un bono de tres meses ofrecido pola consultora
Newcell para a realización dun diagnóstico que axudará á empresa
a reducir custos e xestionar as súas comunicacións.
O acto, ao que asistiron
preto de 150 invitados, celebrouse esta tarde no Hotel Cidade de Vigo
e contou coa presenza do conselleiro de Economía e Industria,
Francisco Conde, así como da tenente de alcalde do Concello de Vigo,
Carmela Silva.
Pola súa banda, o presidente de AJE-Vigo, Rubén
Hermida, lamentou no seu discurso “a caída da capacidade
emprendedora de Galicia, que se sitúa no cuarto peor posto de todas
as comunidades autónomas, e reclamou unha vez máis axudas e apoios
para modificar esta situación”. Volveu insistir “en que
institucións e colectivos empresariais deben traballar para
conseguir mellores condicións que propicien un escenario máis
óptimo e imitar aqueles países e rexións onde a creación de
empresas e riqueza é maior”.