Mos organiza en setembro un novo curso de tecnoloxías móbiles para maiores
xoves, 10 de agosto do 2023
A
Axencia de Colocación do Concello de Mos e a Concellería de
Participación Cidadá que dirixe a edil Julia Loureiro organiza en
setembro un curso de tecnoloxías móbiles para a poboación sénior
do termo municipal. O
novo Taller: Expertclick de uso de apps móbiles para Maiores de
Mos ten neste intre aberto o seu prazo de inscrición.
Impartirase
en dúas datas do vindeiro mes de setembro: o día 25 de 16:00 a
18:00 (sesión 1) e o 26 en horario de 16:00 a 18:00 (sesión 2) en
modalidade presencial.
Expertclick
é un programa de formación para achegar ás persoas maiores de 55
anos as ferramentas necesarias que lles permitan aproveitar
plenamente as vantaxes que brindan as novas tecnoloxías co fin de
aumentar a súa calidade de vida.
“Nos
cursos gratuítos presenciais e en liña”, explican dende a
Concellería de Participación Cidadá de Mos, “a poboación sénior
aprende a navegar con seguridade e confianza por Internet e a
utilizar o seu teléfono móbil ou tableta para comunicarse por
vídeo-conferencia, facer xestións co seu banco, pedir unha cita
médica, mercar en liña ou aproveitar o seu tempo de lecer creativo
na Rede”.
O
obxectivo é “aumentar a súa independencia e autonomía persoal á
hora de comunicarse, realizar trámites e participar de forma activa
na sociedade, mellorando así a súa autoestima e favorecendo un
envellecemento activo e saudábel”.