Movistar lanza un servizo de Internet móbil sen consumo mínimo nin permanencia
venres, 8 de febreiro do 2013
Movistar vén de lanzar
en España o servizo Nomad
Connexion, que consiste nunha achega de acceso a Internet
móbil sen establecemento de consumo mínimo nin permanencia,
arestora xa dispoñíbel para os usuarios dos modelos de tablets
3G El Cano e Edison do fabricante español bq (do que
falamos precisamente este venres para dar conta da súa estrea
oficial no eido dos smartphones, o mes que vén).
Asemade, tamén está operativo no dispositivo Fnac 10 3G. Estes
tablets, de feito, incorporan por defecto unha tarxeta SIM de
Movistar e máis a aplicación dende a que os usuarios poden
rexistrarse en liña no servizo.
Nomad Connexion, como
dixemos, é independente da operadora que teñamos contratada: non
require contrato de permanencia ou cotas mensuais asociadas. O pago
dos bloques de conectividade lévase a cabo con tarxeta de crédito
(“e en menos de 3 minutos desde que se abre o tablet pódese
estar a navegar por Internet en 3G”, sinalan fontes de
Movistar). Este servizo, para o seu funcionamento e calidade na
cobertura, tira partido da rede 3G da operadora en España. O modelo
de pago é por tempo de conexión a Internet, habendo bonos de datos
que van desde unha hora a 0,99 euros (impostos indirectos incluídos)
até unha semana de conexión por 9,99 euros (impostos indirectos
incluídos). Nomad Connexion está baseado na tecnoloxía M2M
Consumer Electronics, “a máis avanzada de Telefónica para
solucións de conexión entre dispositivos electrónicos”,
informa a operadora.