Movistar pechou 2022 con preto do 70% da poboación galega con acceso á súa fibra
venres, 17 de febreiro do 2023
A
operadora
Movistar fixo balance do acadado en 2022 en materia de cobertura
galega de fibra óptica. Segundo explicou no seu informe, foi
quen de pechar o ano levando tecnoloxía de banda larga (a través de
FTTH) a todos os municipios de Galicia e “superando o millón e
medio de fogares e negocios galegos con acceso ás súas redes
ultrarrápidas”. Asi, os 313 municipios galegos dispoñen xa de
polo menos algunhas unidades inmobiliarias con cobertura de FTTH, o
que supón “que o 68,9% da poboación galega conta xa con acceso á
fibra óptica de Movistar”, engádese.
Por
provincias, a fibra de Movistar conecta en Pontevedra a 534.605
unidades inmobiliarias, o que supón o 74,9% da poboación; na
Coruña, 638.665 unidades inmobiliarias, que supoñen o 68,3% da
poboación; en Ourense, 221.915 unidades inmobiliarias, que supoñen
o 66,7% da poboación da provincia; e en Lugo, 145.023 UUII, que
supoñen o 59,7%.
En
palabras de Movistsar, as cifras seguirán a medrar este ano, xa que
“os traballos de despregadura continúan a bo ritmo”, en
colaboración coas administracións estatais, autonómicas e
provinciais, e respondendo ao compromiso de Telefónica e o seu
presidente, José María Álvarez-Pallete, de “conectar toda España
con esta tecnoloxía en 2025”.
A
operadora lembra que a súa tecnoloxía FTTH permite aos clientes
dispor de velocidades simétricas (subida e baixada) da Internet a 1
Gbps ou de televisión en alta definición, ademais de opcións de
teletraballo, gaming, educación ou trámites administrativos.
O
informe conclúe deste xeito: “A nosa fibra, combinada coa
excelente cobertura móbil de Movistar en Galicia, que no caso do 3G
e 4G alcanza ao 98% da poboación, mentres segue avanzando o
despregamento de 5G, converte a comunidade autónoma nunha das máis
avanzadas de España e Europa respecto ao acceso da poboación á
banda larga ultrarrápida”.