Nace TEGRA, a aposta de Telefónica e Gradiant a prol do talento galego en ciberseguridade
mércores, 23 de maio do 2018
- A directora de Telefónica en Galicia, Marta Menéndez, e o director xeral de Gradiant, Luis Pérez Freire
Santiago
acolleu hoxe un novo e importante acontecemento en relación á
alianza Telefónica-Gradiant, unha alianza que deu froitos relevantes
como
a compra de SHADOW por parte da operadora (ferramenta automática
de seguridade e rastrexabilidade desenvolvida polo centro tecnolóxico
galego) ou o
acordo de colaboración entre ElevenPaths (a unidade de seguridade
dixital de Telefónica) e Gradiant. Como consecuencia das boas
sinerxías xeradas e dun compromiso común a prol da protección
tecnolóxica e da información, ambas as dúas partes deron forma ao
novo centro de ciberseguridade de Telefónica, TEGRA, cuxo obxectivo
é emprazar a Galicia no ámbito europeo da salvagarda TIC co
desenvolvemento de produtos e servizos avanzados para as empresas.
TEGRA
presentouse hoxe na Cidade da Cultura da man da directora de
Telefónica en Galicia, Marta Menéndez, e o director xeral de
Gradiant, Luis Pérez Freire. Tamén participaron investigadores de
ElevenPaths e Gradiant debullando as liñas estratéxicas, os
obxectivos e os retos do novo centro.
A
primeira en intervir foi Marta Menéndez, quen puxo o foco na
importancia do eido principal de investigación e desenvolvemento de
TEGRA: a protección das tecnoloxías, das comunicacións e do
coñecemento. “Unha cuestión”, dixo, “que cobra e cobrará
especial importancia, e para a que podemos achegar moitas cousas, e
máis aínda na compaña do centro tecnolóxico Gradiant, no que
confiamos plenamente”. Segundo explicou, o nome de TEGRA fai
referencia directa á importancia estratéxica e defensiva do monte
galego do mesmo nome, na Guarda, que acubillaba un dos nosos castros
máis referenciais e que meirandes posibilidades de vixilancia
fornecía.
Luis
Pérez Freire, pola súa banda, sinalou que “para Gradiant é un
orgullo xogar este papel en materia de ciberseguridade da man de
Telefónica, con quen mellor?”. Tamén expresou a súa total
confianza na continuidade do proxecto conxunto: “Esta é a primeira
pedra dun camiño que será longo”. A continuación, os
investigadores das dúas entidades deron a coñecer múltiples
detalles relevantes sobre o centro galego de ciberseguridade. Por
exemplo, que funcionará como “un polo de atracción TIC en
Galicia, atraendo talento de dentro e de fóra da nosa terra”; ou
que se convidará ás empresas a que presenten de maneira regular as
súas demandas e necesidades en materia de protección
tecnolóxico-dixital.
Asemade,
enumeraron os diferentes bloques dos que constará TEGRA: en primeiro
lugar un de prevención, en segundo lugar un de identidade
(desenvolvendo conxuntamente tecnoloxías avanzadas e cen por cen
eficaces de recoñecemento), en terceiro lugar un bloque de
información a gran escala (o que se coñece como Big Data, un
concepto clave para acadar a máxima intelixencia nos sistemas de
protección que se agarda desenvolver) e en terceiro lugar un bloque
de laboratorios.
Segundo
se fixo saber, TEGRA nace no marco da unidade mixta de investigación
IRMAS (Information Rights Management Advanced Systems), cofinanciada
polo Programa Operativo FEDER 2014-2020 da Unión Europea, que
promove o desenvolvemento tecnolóxico, a innovación e a
investigación de calidade.
Os
obxectivos
O
obxectivo de TEGRA Cybersecurity Center é “desenvolver produtos e
servizos para mellorar a seguridade da información das empresas
mediante técnicas criptográficas avanzadas, deseñar mecanismos de
comprobación da identidade no acceso á información e ferramentas
de análises de datos, ademais de sistemas de clasificación de
documentación e de detección de accesos irregulares á
información”. TEGRA xerará tamén alianzas estratéxicas que
permitan ampliar a seguridade das empresas, colaborando con
organismos e entidades como a Comisión Europea, CyberThreat
Alliance, Europol, INCIBE, a Organización de Estados Americanos
(OEA) e a European Cyber Secutiry Organisation (ECSO), da que
Telefónica e Gradiant son socios.
Outro
dos obxectivos de TEGRA é xerar emprego en I+D+i en Galicia.
Asemade, encamíñase a emprazar a nosa terra no epicentro da
actividade tecnolóxica en protección dixital. “Ante o avance das
ameazas mundiais en ciberseguridade”, sinalouse hoxe, “TEGRA
sitúa a Galicia nunha posición de relevancia na política europea
nesta materia, en consonancia coa Estratexia Europea de
Ciberserguridade”.
O
centro arrinca a súa actividade con 32 especialistas e dúas
oficinas, unha na sede de Gradiant en Vigo e outra na sede de
Telefónica na Coruña. A operadora e o centro tecnolóxico
participan no novo centro cun investimento semellante: 1,2 millóns
de euros por parte de Telefónica e 1,1 millóns por parte de
Gradiant, e a Xunta de Galicia, a través da Axencia Galega de
Innovación (GAIN) fornece máis de 678.000 euros. No ámbito
organizativo, o centro TEGRA estará co-dirixido por Juan Elosua,
procedente de Telefónica-ElevenPaths, e Juan González, de Gradiant.