O 40% do Grove xa goza de banda larga
mércores, 22 de febreiro do 2023
José
Miñones, delegado do Goberno en Galicia, e Carmela Silva, presidenta
da Deputación de Pontevedra, estiveron este mércores 22 de febreiro
no Grove para tomar o pulso do proceso para dotar de cobertura de
banda larga á totalidade dos concellos da provincia, proceso
impulsado dende o Goberno ao abeiro do Plan Único. Segundo fixo
saber Miñones, o Executivo central está a mobilizar 1.000 millóns
de euros para acadar a conectividade total antes de 2025. Miñones e
Silva reuníronse en Porto Meloxo (O Grove) co alcalde José
Cacabelos, coincidindo co despregue da banda larga nesta zona do
territorio grovense, que xa chega ao 40% da poboación.
Miñones
explicou que na provincia de Pontevedra, a convocatoria de 2021 do
Plan Único foi adxudicada a Telefónica, que ten de prazo ata
decembro de 2023 para rematar as obras nas 18.973 vivendas que
recibirán a fibra óptica. Porén, a convocatoria de 2022 foi parar
a Avatel Telecom, que dispón dun prazo ata decembro de 2024 para
sumar outras 18.973 vivendas. Deste xeito, antes do ano 2025 disporán
da banda ancha un total de 41.289 vivendas da provincia gracias á
mobilización dun total de 16.166.245 euros nestas dúas
convocatorias. O plan completarase, para alcanzar o obxectivo do 100%
de cobertura, cunha terceira convocatoria neste ano 2023 que inclúe
tamén a expansión do 5G.
José
Miñones engadiu que, complementariamente ao despregue da fibra
óptica, a partir da próxima primavera comezarán a operar os
enlaces vía satélite 5G para as áreas rurais da provincia nas que
sexa imposíbel o tendido. Farase no marco do gran contrato asinado
polo Goberno de España con Hispasat e, ademais, a un prezo fixo de
35 euros ao mes. O plan estatal contempla, adicionalmente,
subvencións de ata 600 euros para os particulares, empresas e mesmo
concellos para a instalación dos equipos de recepción e
distribución do sinal.
Pola
súa banda, o alcalde do Grove, José Cacabelos, explicou que un 40%
do seu municipio xa goza de banda larga e destacou que Porto Meloxo é
o último exemplo dun avance na conectividade que tamén se concretou
en lugares como San Vicente, Balea, Boibas, Meloxo ou Reboredo “que,
podería pensarse, serían os últimos e en cambio están sendo os
primeiros, mesmo por diante dalgunhas rúas do núcleo urbano, onde
estamos comezando agora mesmo as obras de tendido da fibra óptica”.
En moi pouco tempo, celebrou, “o 100% do Grove terá conectividade
á Internet de altas prestacións e iso mellorará a vida da xente,
porque todo o mundo ten hoxe un dispositivo tecnolóxico conectado,
pero tamén será algo extraordinario para as empresas e para a
hostalería de toda a zona, que verán incrementada a súa
competitividade”.