O BNG solicítalle ao goberno a mellora dos dispositivos de seguimento dos maltratadores
mércores, 3 de decembro do 2008
A deputada do BNG no Congreso, Olaia Fernández Davila, vén
de rexistrar unha iniciativa parlamentaria na Cámara Baixa na que lle demanda
ao Goberno que “mellore os dispositivos
de seguimento dos maltratadores e, sobre todo, que amplíe os espazo de
protección das vítimas de violencia de xénero”.
Fernández Davila considera “insuficiente” o ámbito de alerta destes dispositivos, “reducidos ao entorno das vivendas das vítimas”
e recomenda “ampliar o espectro de alerta”
e “empregar estes dispositivos
electrónicos de xeito coordenado entre o que leva o maltratador e a vítima, de
xeito que alerte da proximidade do maltratador, independentemente do lugar no
que se atope, sexa ou non no domicilio”.
Asemade, a parlamentaria nacionalista pregunta ao Goberno “cales son as conclusións da investigación en
curso sobre os fallos producidos no sistema de seguimento do preso de A Lama, Maximino Couto, que o pasado sábado asasinou á súa compañeira María del Rosario
Peso”.
Outra das cuestións que Davila puxo enriba da mesa é “a formación do persoal encargado do
seguimento dos maltratadores” e cuestionoulle ao Ministerio de Interior se
o persoal encargado de facer o seguimento dos dispositivos que portan os
agresores, “contan coa debida formación
en liña co establecido na Lei Integral contra a Violencia de Xénero”?
