O CEIP Ponte dos Brozos recibe un recoñecemento internacional de Chromville.com
luns, 9 de xuño do 2014
- Martín no centro da imaxe xunto a Hugo Vieites e Naiara que tamén conseguiron unha mención honorífica
O
CEIP Ponte dos Brozos de Arteixo, que a semana pasada celebrou no
Centro Tecnolóxico local a
terceira
edición das Xornadas de Experiencias TIC
(uns encontros para dar a
coñecer diferentes traballos innovadores sobre uso das TIC con
potencialidades no ensino e na programación), recibiu unha nova
mención de innovación educativa. O premio en cuestión (primeiro
premio do certame no que se insire), que veu da man dos responsábeis
da web Chromville.com, foi
comunicado ao centro docente galego a través dunha sesión de
videoconferencia desenvolvida o pasado venres.
O
galardón, de carácter internacional, veu
motivado polo bo facer do alumno de terceiro curso de Educación
Primaria Martín Souto Aldao, baixo a coordinación da súa
mestra Begoña Codesal Patiño. O seu cometido consistiu no emprego
lúdico-educativo de materiais baseados nas tecnoloxías e
metodoloxías de realidade aumentada. Os outros finalistas do certame
foron Mehreen Naqvi de Pennsylvania. Estados Unidos e Madalyn Deyoung
de Michigan, tamén dos Estados Unidos.
Máis
polo miúdo e segundo informa o CEIP Ponte dos Brozos, o desafío
baseouse na creación dunha historia dotándoa de animación en 3D e
empregando a contorna que ofrece a devandita web de xeito gratuito. A
comunidade educativa do centro arteixán xa amosou a súa fonda
satisfacción por este novo logro educativo “que impulsa a un
colexio público a nivel internacional”, explican.
Sinalar
que Chromville.com é unha iniciativa dirixida
a fomentar a aprendizaxe innovadora no eido internacional. A súa
actividade baséase sobre todo en fornecer unha aplicación educativa
baseada en 3D e en realidade aumentada, “un universo interactivo
onde os nenos aprenden divertíndose grazas ao uso das novas
tecnoloxías”, sinalan os responsábeis de Chromville.com, que a
través da súa ferramenta de balde permiten aos nenos converterse en
protagonistas das súas propinas historias. A aplicación é tamén a
base do concurso internacional lanzado dende Chromville.com,
destinado a localizar no mundo os mellores traballos desenvolvidos a
raíz da app en cuestión.